Layihə gücü 2,8 meqavat olacaq "Sumqayıt” Günəş Elektrik Stansiyasında (GES) 1,7 meqavat generasiya gücü quraşdırılıb və onun ümumi enerji sisteminə qoşulması işləri davam etdirilir.

Bu barədə məlumatı Azərbaycan Respublikası Alternativ və Bərpa Olunan Enerji Mənbələri üzrə Dövlət Agentliyindən (ABOEMDA) veriblər. Bildirilib ki, Prezident İlham Əliyevin respublikadakı alternativ mənbələr hesabına enerji hasilatının artırılmasına dair tapşırıqlarına əsasən, ABOEMDA-nın "Azalternativenerji” Məhdud Məsuliyyətli Cəmiyyəti (MMC) tərəfindən yol qovşaqları və rayon tipli günəş elektrik stansiyalarının tikintisi davam etdirilir. Bakı-Quba magistral yolunun 32-ci kilometrliyindəki "Sumqayıt” GES-in tikintisinə "Azalternativenerji” MMC tərəfindən ötən ilin ortalarından başlanılıb. Stansiya yol qovşaqları arasındakı boş torpaq sahələrinin səmərəli istifadəsi və yol-nəqliyyat sisteminin elektrik enerjisi ilə təmin olunması məqsədilə tikilir. Stansiyada istehsal olunacaq enerji vasitəsilə təxminən 90 kilometr yolun (hər lampanın gücü 500 Vatt olması şərti ilə) ikitərəfli işıqlandırılması və müvafiq yol-nəqliyyat qurğularının elektrik enerjisi ilə təmin olunması nəzərdə tutulur.

Stansiyanın inşasında "Azgüntex” Məhdud Məsuliyyətli Cəmiyyətində istehsal olunan günəş panellərindən istifadə edilir.  (azertag.az)