"Çevik məzənnə siyasətinə keçidlə bağlı məsələlər ciddi araşdırılır."
"Çevik məzənnə siyasətinə keçidlə bağlı məsələlər ciddi araşdırılır. Bu siyasətə keçid texniki hazırlıq və soyuqqanlı yanaşma tələb edir.”
Bu sözləri Azərbaycan Mərkəzi Bankının (AMB) İdarə Heyətinin sədri Elman Rüstəmov deyib.
"Bununla bağlı beynəlxalq təşkilatlarla müzakirələr aparırıq. Manatın məzənnəsi neftin qiyməti, tədiyyə balansının vəziyyəti və tərəfdaş ölkələrin valyuta siyasəti ilə müəyyənləşir. 2016-cı ildə də belə olacaq. Göründüyü kimi, məzənnəyə təsir edən başlıca amillər ölkədən, milli iqtisadiyyatdan kənarda formalaşır. Müxtəlif çevik məzənnə siyasəti çoxdandır ki, AMB-nin gündəliyindədir. Bu məsələlər ciddi araşdırılır. Əlaqədar beynəlxalq təşkilatlarla geniş müzakirə edilir.”
Baş bankir yüksək dollarlaşma səbəbindən Mərkəzi Bankının valyuta ehtiyatlarının azaldığını bildirib.
"2014-cü ildə AMB-nin valyuta ehtiyatları 15 mlrd. dollar olub. Bu ehtiyatları biz daxili bazardan almışdıq. Devalvasiyadan sonra ilk dəfə may-iyun aylarında biz daxili bazardan dollar aldıq. İyul ayında isə dollarlaşma səviyyəsi yenidən yüksəldi. İndi dollarlaşma səviyyəsi 10 il əvvəlki səviyyədədir. Hazırda AMB-nin valyuta ehtiyatlarının 7 mlrd. dollar olduğunu deyən E. Rüstəmov bu göstəricinin beynəlxalq normalara uyğun olduğunu bildirib."
Elman Rüstəmov-AMB-nın İdarə Heyətinin sədri
Mərkəzi Bankında keçmək istədiyi çevik məzənnə rejiminin mahiyyəti odur ki, tətbiq edildiyi zaman valyutanın məzənnəsi ona olan tələb və təklifin təsiri əsasında formalaşır, hər gün və tez-tez dəyişir. Müstəsna hallarda Mərkəzi Bank məzənnənin kəskin tərəddüdlərinin qarşısını almaq məqsədilə valyuta bazarına müdaxilə edib məzənnə dəyişikliyini "hamarlaya” bilər.
Bir müddət əvvəl maliyyə naziri Samir Şərifov da çevik məzənnə siyasətinə keçidlə bağlı işarə müzakirələrin getdiyini bildirmişdi.
"Hazırda Azərbaycanda da bunun tətbiqi ilə bağlı işlər aparılır. Qazaxıstan artıq bunu elan edib. Bu gün bu məsələyə cavab vermək bir az tez olar. Amma mənim fikrimcə, hal-hazırda Mərkəzi Bank bu istiqamətdə müvafiq iş aparır. Hesab edirəm ki, optimal bir variant tapılıb və tətbiq olunacaq.”
Samir Şərifov-maliyyə naziri
Bəzi ekspertlər isə çevik məzənnə siyasətinə keçidin Azərbaycan üçün bir o qədərdə faydalı olmayacağını deyirlər. Çünki bu zaman Mərkəzi Bank manat üzərində nəzarətini itirəcək və dünya bazarındakı qiymətlərlə tənzimlənəcək. Yəni ki, bir dollar bəzən iki manat, bəzən isə bir manat ola bilər. Xarici təcrübə göstərir ki, bu keçidlə əlaqədar ölkənin bank və maliyyə sektorunda bir sıra problemlər yararana bilər.
Qazağıstan təcrübəsinə nəzər saldıqda belə problemlərin adı çəkilən dövlətdə artıq yarandığını görə bilirik. Qonşu ölkədə hökümət bu problemlərin yaranacağını əvvəlcədən bildiyi üçün qabaqlayıcı tədbirlərlə çatışmazlıqları tez bir zamanda aradan qaldırdı. Qazaxıstan prezidentinin xüsusi göstərişi ilə sahibkarlar və banklar üçün yaranan əlavə xərcləri hökümət öz üzərinə götürdü.(ANS PRESS)
Xəbərdən istifadə edərkən istinad etmək vacibdir.
