"Mərkəzi Bank manatın təqribən 50% devalvasiyasına səbəb olan üzən məzənnə rejiminə keçilməsi barədə bu günkü qərarının 3 məqsədini belə sıralayır: (1) "tədiyə balansının tarazlaşdırılması”; (2) "ölkənin valyuta ehtiyatlarının kritik səviyyədə qorunması”; (3) milli iqtisadiyyatın beynəlxalq rəqabət qabiliyyətinin təmin olunması”. Ölkənin valyuta ehtiyatlarının sürətlə əriməsi prosesi bəlkə də müvəqqəti səngiyə bilər (rəsmi valyuta ehtiyatları hələlik 8 aylıq idxalı qarşılayır). Amma neftin 35-40 dollar ətrafında dəyişən qiyməti, tədiyyə balansının cari əməliyyatlar və maliyyə hesabının indiki vəziyyəti, habelə güclü ixrac potensialı olmayan qeyri neft-qaz sektoru (qeyri neft-qaz ixracı ÜDM-in cəmi 2.7%-i qədərdir) yuxarıdakı 1-ci və 3-cü məqsədləri çətinləşdirir."
Bu sözləri İqtisadçı-ekspert Kənan Aslanlı manatın ABŞ dollarına qarşı 48%-lik devalvasiyasına münasibət bildirərkən deyib.
K. Aslanlı qeyd edib ki, Mərkəzi Bankın bəyanatında ən realist məqam güclənən xarici iqtisadi şokların "uzunmüddətli xarakter daşıması” müddəasıdır: "Yəni 2016-cı ildə bizi hər baxımdan daha mürəkkəb bir vəziyyət gözləyir. Ölkə "3 İ" sindromunun məngənəsində hələ bir müddət sıxılmağa davam edəcək: işsizlik, inflyasiya və inamsızlıq (o cümlədən, manata)."
Xeberle.com
Xəbərdən istifadə edərkən istinad etmək vacibdir.