Hər həftənin şənbə və bazar günləri Sumqayıtın avtomobil bazarında 1000-ə yaxın yeni və işlənmiş maşınlar satışa çıxarılır. Avtomobillərin qiyməti onun markası və buraxılış ilindən asılı olaraq dəyişir. Avtomobil bazarlarında vəziyyət ürəkaçan deyil. Satıcılar alıcı azlığından, alıcılar isə qiymətlərin baha olmasından gileylənirlər. Bu da bazarda durğunluğun yaşanmasına gətirib çıxarır. Bazarda satılan maşınların əksəriyyəti Rusiya istehsalı olan avtomobillərdir. Rusiya istehsalı olan avtomobillərlə digər ölkələrdən gətirilənlər arasında fərq var. Sovet istehsalı olan maşınların qiyməti bahalaşıb. Qiymət artımı əsasən köhnə avtomobillərdə müşahidə olunur. Bazara gələn azsaylı alıcılar da qiymətlərin yüksək olmasından narazıdırlar. Almaniya istehsalı olan maşınların qiyməti aşağı düşsə də, bazarda real alıcı demək olar ki, yoxdur. Yalnız minik avtomobilləri deyil, yük avtombillərinin satışında da durğunluq yaşanır. Sumqayıt avtomobil bazarının nümayəndəsi Hacı Rəsulov da son vaxtlar vəziyyətin heç də ürəkaçan olmadığını deyir. Müşahidələrimizdən belə qənaətə gəldik ki, ikinci əl avtomobil bazarında qiymətlər 25-30 faiz artıb. Xüsusilə də Rusiya istehsalı olan avtomobillərdə. Bahalaşma avtomobillərin bazar qiymətindən asılı olaraq 500 manatdan 2000 manata kimi dəyişir. Tələbat artdıqca qiymət də artır.
RAMİL ZEYNALLI
Xəbərdən istifadə edərkən istinad etmək vacibdir.
