Dənli bitkilərin istehsalının artırılması kənd təsərrüfatının qarşısında duran əsas məsələlərdən biri olmaqla, ölkə əhalisinin ərzaq təhlükəsizliyinin təminatında əsas strateji sahədir.
Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyevin verdiyi məlumata görə, bu il payızlıq taxıl, dənli və paxlalı bitkilər də daxil olmaqla 967 min hektar əkin sahəsi əkilib.
Nazirlik rəsmisinin sözlərinə görə, onun 327 min hektarını arpa, 620 min hektarını buğda təşkil edir:
"Ümumilikdə keçən illə müqayisədə bu il dənli bitkilərin əkin sahəsi 2,4 faiz, buğdanın əkin sahəsi isə 7 faiz artıb. Bizim mütəxəssislərimizin apardığı monitorinqlər, rayonlarda keçirilən reydlər, müşavirələr, fermerlərlə görüşlər onu deməyə əsas verir ki, hələlik taxıl sahələrində vəziyyət yaxşıdır. Yəni ilk bitiş, kollanma yaxşı səviyyədədir. Keçirilən müşavirələrdə əsas diqqət aqrotexniki tədbirlərin vaxtında yerinə yetirilməsinə yönəlib. Ümumilikdə taxılçılıqda 50-ə yaxın aqrotexniki tədbirlər var. Biz onların hamısını vaxtında həyata keçirməklə həm yüksək keyfiyyətli məhsul əldə edərik, həm də potensial məhsuldarlığa çatarıq”.
M.Hacıyev deyib ki, Azərbaycanın torpaq-iqlim şəraiti məhsul istehsalını artırmaq üçün əlverişlidir:
"Bunun üçün potensial imkanlarımız var. Həm bizim yerli sortların bioloji xüsusiyyətləri, həm də torpaq-iqlim şəraiti imkan verir ki, biz haradasa 6-7 ton məhsul əldə edə bilək.
Amma fermerlərin də üzərinə düşən əsas məsələ kompleks olaraq aqrotexniki tədbirləri icra etməkdir. Hazırda gübrələmə, suvarma, təxminən 10 gündən sonra alaq otlarına qarşı tədbirlərin həyata keçirilməsi başlayacaq. Tədbirlər vaxtında icra olunarsa, biz hədəfə çatarıq. Bildiyiniz kimi keçən il orta məhsuldarlıq 30 sentiner oldu. Elə fermerlərimiz var, 6-7 ton məhsul əldə etdi. Bu gün bizim potensial imkanlarımız var ki, orta məhsuldarlığı artıraq. Əsas şərtlərdən biri aqrotexniki tədbirlərin yerinə yetirilməsidir”.
O qeyd edib ki, iyul ayının əvvəlindən arpa biçini, iyulun 15-dən sonra isə aran bölgəsində, sentyabra qədər dağlıq və dağətəyi bölgələrdə taxıl biçini aparılır.(Modern)
Xəbərdən istifadə edərkən istinad etmək vacibdir.
