SOCAR-ın təlim mərkəzlərinə şagird qəbulu üzrə Qəbul Komissiyası Təlim, Tədris və Sertifikatlaşdırma İdarəsinin Sumqayıt Təlim, Tədris Mərkəzinə (STTM) və Dənizdə insan həyatının mühafizəsi üzrə Təlim Mərkəzinə (DİHMTM) 2017-2018-ci tədris ili üçün sənəd qəbulu elan edib.
Şirkətdən AZƏRTAC-a bildirilib ki, sənəd qəbulu mayın 26-dan iyunun 5-dək aparatçı, elektrik avadanlıqlarının təmiri və xidməti üzrə elektrik montyoru, elektrik qaz qaynaqçısı, kompressor qurğularının maşinisti, nasos qurğularının maşinisti, nəzarət ölçü cihazları və avtomatika, qazla kəsən və I-II dərəcə iş qrupu üzrə IV dərəcəli dalğıc ixtisasları üzrə keçiriləcək. Yalnız kişilər müraciət edə bilər.
Təlim mərkəzlərinə qəbul olunan şagirdlərə aylıq təqaüd, xüsusi geyim, gündəlik nahar, müvafiq peşə üzrə SOCAR-da vakansiya olduqda iş təklifi və beynəlxalq səviyyədə tanınan sertifikat kimi təminatlar verilir. Aşağıdakı şərtlərə cavab verən iddiaçılar müsabiqəyə buraxılacaqlar: Azərbaycan Respublikası vətəndaşlığı; STTM üçün - hərbi bileti olan (Həqiqi hərbi xidmət keçməsindən asılı olmayaraq), DİHMTM üçün – həqiqi hərbi xidmətə yararlı; STTM üçün - sağlamlığı müvafiq peşənin tələblərinə uyğun (Sağlamlıq haqqında arayış forma-86), DİHMTM üçün - ruhi-əsəb və narkoloji dispanserlərdən sağlamlıq haqqında arayış); STTM üçün - Abşeron rayonu və ya Sumqayıt şəhərində qeydiyyatda olmalı (məcburi köçkün), DİHMTM üçün - respublika üzrə hər hansı yerdə qeydiyyatda olmalı. DİHMTM müraciət edənlər üçün fiziki parametrlər - boy (170-185 santimetr), çəki (65-90 kiloqram), suda 200 metr məsafəyə üzmə, turnikdə 7-8 dəfə dartınma, sentyabrın 15-dək 29 yaşı tamam olmamış, ən azı tam orta təhsili olan gənclər (Hal-hazırda təhsilini davam etdirən gənclər müraciət edə bilməzlər).
Müsabiqəyə 3 mərhələdə aparılacaq: birinci mərhələ- elektron sənəd qəbulu, ikinci mərhələ- müsahibə (Namizədlərin sənədlərinin əsli yoxlanılır və onlarla müsahibə keçirilir, DİHMTM üçün əlavə olaraq fiziki parametrlər və üzgüçülük qabiliyyəti yoxlanılır), üçüncü mərhələ isə (STTM) - test imtahanı (Test imtahanında müvəffəqiyyət qazanan namizədlər təlim mərkəzinə qəbul olunurlar). Üçüncü mərhələ (DİHMTM) - test imtahanında uğur qazanan namizədlər öz hesablarına Dalğıc-tibbi komissiyasında müayinədən keçir və müayinənin nəticəsi qənaətbəxş olduqda qəbul olunurlar.
Müsabiqədə yalnız www.socar.az internet səhifəsinin Karyera bölməsinin Təlim mərkəzlərinə sənəd qəbulu alt bölməsində elektron Müraciət formasını doldurmaqla iştirak etmək olar. Müraciət qaydaları və qəbul haqqında ətraflı məlumatı da internet səhifəmizin qeyd olunan alt bölməsindən əldə etmək mümkündür. İddiaçılar təklif olunan ixtisaslardan yalnız birini seçmək hüququna malikdirlər (təkrar qeydiyyatdan keçən eyni iddiaçının yalnız sonuncu müraciəti əsas götürüləcək).
Vətəndaşları maraqlandıran, onlar tərəfindən ən çox soruşulan suallara cavablar Suallar bölməsində əks olunub. Müraciət etmiş bütün namizədlərin siyahısı 4 iş günü ərzində Namizədlər bölməsində yerləşdirilir (Yuxarıda qeyd olunan şərtlərdən ən azı biri ödənilmədikdə namizədin statusu "seçilməmiş” hesab olunur). SOCAR-ın Təlim, Tədris və Sertifikatlaşdırma İdarəsi və onun təlim mərkəzləri barədə www.ttsi.socar.az saytından və "facebook” səhifəsindən daha ətraflı məlumatlar əldə etmək olar. Qəbul haqqında hər hansı bir sualı olan vətəndaşlar [email protected] elektron poçt ünvanına yazılı müraciət göndərə bilərlər. Müsabiqəyə son müraciət tarixi iyunun 5-dir.

Xəbərdən istifadə edərkən istinad etmək vacibdir.