Xəbər verdiyimiz kimi, Tarif Şurasının qərarı ilə, ən çox istifadə edilən Aİ-92 markalı benizinin hər litri üçün satış qiymətini 70 qəpikdən 90 qəpiyə qaldırıb.Xeberle.com məlumat verir ki, iqtisadçı-ekspert Kənan Aslanlı benzinin qiymətinin bahalaşmasını şərh edib. Onun sözlərinə görə benzinin qalxmasının xaricdən gələn malların qiymətinə birbaşa təsiri olmayacaq. Lakin daxili bazarda yanacağın qiymətinin artması ilə nəqliyyat, daxili tələbat malları və s. kimi sahələrdə yüksək səviyyədə olmasa da, qiymət artımı müşahidə oluna bilər: "Düşünürəm ki, qiymət artımının nəqliyyat xidmətlərinə təsiri nəticəsində digər istehlak xidmətlərinə də təsiri olacaq. Hansı ki, ölkənin daxili bazarında inflyasiya idxaldan qaynaqlanaraq, o qədər də aşağı səviyyədə deyil. Çünki manatın məzənnəsi aşağı düşdükcə xarici valyuta ekvivalentləri ilə idxal olunan məhsulların inflyasiyası baş verir. İdxal inflyasiyasının payıza doğru bir qədər də artması gözlənilir. Tarif Şurasının bu qərarıyla də bir-iki aya idxal inflyasiyası ilə bərabər ölkənin daxili bazarlarında nəqliyyatın qiymətinin qalxması və bununla da gündəlik tələbat və digər malların qiymətlərində inflyasiyanın baş verməsi gözlənilir. Bu, artıq müəyyən bir müddət sonra qiymətlərdə də özünü göstərəcək”. K.Aslanlı yanacağın qiymətinin artmasının avtomobil bazarına göstərəcəyi təsirlərdən danışıb. "Nəzəri olaraq yanaşsaq, yanacağın bahalaşması insanları ictimai nəqliyyat və s. kimi alternativ yollara üz tutmağa sövq edir. Belə olduğu halda avtomobilə olan tələbatın azlığı onun ucuzlaşması ilə nəticələnir. İdxal olunan avtomobillərin ölkəyə idxal inflyasiyası ilə daxil olmasına görə Azərbaycanda bu mənada ucuzlaşma gözlənilmir. İkinci əl avtomobillərin qiyməti isə yüksəkdir və son zamanlar bir qədər də artıb. Bu baxımdan artımın yaxın zamanlarda avtomobil bazarına təsiri gözlənilmir”. Ekspert, həmçinin manatın məzənnəsinə də toxunub: "Tarif Şurasının məhz bu qərarından irəli gələrək, ölkənin nominal valyutasında kəskin dəyişikliklər gözlənilmir. Şəxsən mənim gözləntilərimə görə, manatın məzənnəsi payıza qədər 1.7-1.8 manat arasında dəyişəcək.”