Azərbaycanda müxtəlif sahələrdə çalışanların əmək haqları davamlı olaraq artırılır. Bu səbəbdən də əmək haqlarının artırılmasına bir növ adət edən insanlar, bir il keçməmiş növbəti artımın nə vaxt olacağını səbirsizliklə gözləyirlər. İndi Azərbaycanda əmək haqlarının növbəti dəfə artırılması məsələsi gündəmdədirmi? 

Milli Məclisin Sosial siyasət komitəsinin sədr müavini Musa Quliyev Modern.az-a deyib ki, əmək haqqının artırılması məsələsi ölkə iqtisadiyyatına bağlıdır: 

“Əgər ölkədə inflyasiya baş verirsə, hər hansı məhsulların bahalaşması özünü göstərirsə, buna uyğun olaraq kompensasiya edib, əmək haqqı qaldırılır. Digər tərəfdən, əhalinin sosial rifahının yaxşılaşdırılması məqsədi ilə ölkənin iqtisadi gücü buna imkan verərsə, əmək haqqını qaldırmaq olar”.

Musa Quliyev belə təcrübənin Azərbaycanda daha aktual olduğunu vurğulayıb: “Onu da deyim ki, bütün dünya ölkələrində hər il əmək haqqının qaldırılması praktikası yoxdur.  Son 10 ildə hər il prezident İlham Əliyev tərəfindən əmək haqqının qaldırılması barədə fərman və sərəncamlar imzalanıb. Elə öyrəşmişik ki, sanki hər il əmək haqqı qaldırılmalıdır. Bu da son 10 ildə Azərbaycanın sürətli inkişafına bağlı bir məsələdir. Elə ölkələr var ki, on illərlə əmək haqqı qaldırılmır. Elə ölkə də var ki, əksinə, əmək haqqı kəsilir, aşağı salınır, iş saatları artırılır, pensiya və müavinətlər azaldılır. Portuqaliya, İspaniya kimi dövlətlər Avropa Birliyinin (AB) üzvləridir. Amma o dövlətlərdə müxtəlif sosial ödənişlərin, əmək haqlarının azaldılması baş verir. Buna görə də hər il əmək haqqının artırılması barədə fikir söyləmək doğru deyil. Azərbaycanda əmək haqlarının artırılmasında hələ bir il keçməyib. İndi əmək haqlarının qaldırılmsına zərurət yoxdur. Bunun üçün ya inflyasiya, ya da şiddətli bahalaşma olmalıdır. Ona görə də bu ilin sonuna kimi Azərbaycanda müxtəlif sahələrdə çalışanların əmək haqlarının qaldırılmasında zərurət görmürəm. Ancaq gələn ilin büdcəsinin imkanlarına görə əmək haqları artırıla bilər”.

Deputat son günlər ölkədə kənd təsərrüfatı məhsullarının bahalaşmasına da diqqət çəkib: “Son günlər mətbuatda bəzi kənd təsərrüfatı məhsullarının qiymətlərinin artırılması haqqında məlumatlar oxudum. Ötən illərlə müqayisə apardım və ciddi fərq hiss etmədim. Guya sanksiyalarla bağlı Azərbaycan məhsulları Rusiyaya daşınır. Bu da özünü doğrultmadı. Gömrük orqanlarının məlumatları da sübut edir ki, Rusiyaya keçən ildəkindən artıq məhsul getməyib. Azərbaycanda kəndli vətəndaş məhsullarını ucuz qiymətə sata bilirsə, niyə kənara aparmalıdır?! Sanksiyalarla bağlı kənd təsərrüfatı məhsullarının Rusiyada aparılması özündən müşdəbeh “dostlarımız”ın ortaya atdığı fikirdən başqa bir şey deyil. “Bazar od tutub yanır” kimi iddialar irəli sürmək doğru deyil. Əslində kənd təsərrüfatı məhsullarının qiymətinin baha olmasının tərəfdarıyam. Kəndlini, kəndi qorumaqdan ötrü belə imkanlar yaradılmalıdır. Kəndli öz məhsulunu maya dəyərindən aşağı bazara çıxaracaqsa həmin kəndli gələn il o məhsulu yetişdirməyəcək. Hesab edirəm ki, şəhər hər zaman kəndi dolandırmalıdır”.

Namidə BİNGÖL