İran və İraq, S.Ərəbistanının neft bazarını sabitləşdirmək məqsədilə neft ixracını azaltmasından istifadə edərək öz ixraclarını artırıblar. Xeberle.com "Report"a istinadən xəbər verir ki, adıçəkilən iki ölkə S.Ərəbistanının Çin və ABŞ-da azalan bazar payını ələ alıblar. İraqın neft ixracı sentyabr ayında 3,98 mln. barel/günə yüksələrək son 10 ayın maksimum həddinə çatıb. İranın ixracı isə 2,28 mln. barel/günə - 7 aylıq maksimuma yüksəlib. S.Ərəbistanının ixracı isə 7,7 mln. barel/gün ilə müqayisədə 6,68 mln. barel/gün təşkil edib.
İyul ayında S.Ərəbistanının ABŞ-a neft ixracı son 34 ilin mimimum səviyyəsinə geriləyib. Əvəzində, İraq ABŞ-a neft ixracını sentyabrda 871 min barel/günə çatdıraraq S.Ərəbistanının bu ölkəyə ixrac həcmini ötüb. Avqustda isə onların ABŞ-a ixracı S.Ərəbitanından 2 dəfə çox olub. İraqın Hindistana neft ixracı isə 2017-ci ildə orta hesabla 794 min barel/gün təşkil edib. Belə ki, S.Ərəbistanında analoji göstərici 738 min barel/gündür.
İran isə Çin bazarında S.Ərəbistanını sıxışdırmağa davam edib. Sentyabrda S.Ərəbistanı Çinə 833 min barel/gün, İran isə 600 min barel/gün neft ixrac edib və sanksiyalardan sonra ixracı 2 dəfə artırıb.
Qeyd edək ki, neft bazarının sabitliyinin təmin olunması üçün S.Ərəbistanı noyabr ayından etibarən ixrac həcmini 560 min barel azaldaraq 7,15 mln. barel/günə salmaq qərarı verib.

Xəbərdən istifadə edərkən istinad etmək vacibdir.