Xeberle.com xəbər verir ki, görüş iştirakçılarını salamlayan Sumqayıt Dövlət Universitetinin Sosial məsələlər və ictimaiyyətlə əlaqələr üzrə prorektoru Elmar Xəlilov gənclərin könüllü fəaliyyətlərə qoşulmasının onların yeni bilik və bacarıqlara yiyələnməsi, eyni zamanda sosial sahədə uğur qazanmasına geniş imkanlar yaratdığını diqqətə çatdırıb. Sumqayıt şəhərinin bu il gənclər paytaxtı olduğunu və buna görə də buradakı gənclərin üzərinə böyük məsuliyyətin düşdüyünü bildirən Elmar Xəlilov Sumqayıt Dövlət Universitetində keçirilən təqdimat üçün "Regional İnkişaf” İctimai Birliyinə təşəkkür edib.

Daha sonra Layihələr və könüllülərlə iş şöbəsinin müdiri Adilə Əliyeva "Regional İnkişaf” İctimai Birliyinin fəaliyyət istiqamətləri, məqsəd və vəzifələri, həmçinin elm, təhsil, sosial, idman, səhiyyə və digər sahələrdə həyata keçirdiyi layihələr barədə danışıb. Adilə Əliyeva çıxışında könüllülük fəaliyyətinin müasir gənclərin sosiallaşması və fərdi inkişafındakı əhəmiyyətindən, könüllü kimi əldə edilən təcrübələrin onlara qazandırdığı uğurlardan danışıb, gənclərə bu istiqamətdə tövsiyələrini çatdırıb.

"Regional İnkişaf” İctimai Birliyin əməkdaşları Şəfiqə Tağızadə və Fuad Adgözəlov tərəfindən İctimai Birliyin fəaliyyətində könüllülərin rolu, onların fərdi inkişafı üçün görülən işlər haqqında təqdimat keçirilib və müxtəlif tədbirlərdə iştiraklarını əks etdirən videoçarx nümayiş olunub. 

Tədbirin davamında "Regional İnkişaf” İctimai Birliyinin könüllü sıralarına qoşulmaq istəyən gənclərlə fərdi görüşlər keçirilərək qeydiyyatları aparılıb.

Qeyd edək ki, gənclər arasında könüllülük fəaliyyətini təşviq etmək məqsədilə digər regionlarda da bu cür təqdimatların keçirilməsi nəzərdə tutulur.