Bu sanksiyaların bu günədək tətbiq olunanlar arasında ən sərt sanksiyalar olacağı gözlənilir. Çünki Rusiyanın ən aparıcı sektoru, iqtisadiyyatının qan-damar sistemi məhz energetika sahəsidir.
Bu sözləri Axar.az-a iqtisadçı Natiq Cəfərli ABŞ Maliyyə Nazirliyinin Rusiyaya energetika sahəsində sanksiyaların necə tətbiq etməsi ilə bağlı açıqlamasına münasibət bildirərkən deyib. O bildirib ki, Rusiya iqtisadiyyatının böyük bir hissəsi qaz, enerji gəlirləri hesabına formalaşır:
"Sanksiyaların tətbiqi ən azından yeni texnologiyaların, enerji sahəsində böyük yatırımların Rusiya bazarına daxil olmasına mane olacaq. Bu da energetika sektorunda bir neçə ildən sonra daha ciddi problemlərin yaranmasına yol açacaq. Doğrudur, sanksiyaların Rusiya iqtisadiyyatına təsir etməsi bir az zaman alacaq. Ancaq yeni texnologiyaların alınmasında və yeni layihələrin işlənməsində bu məsələ daha çox hiss ediləcək”.
İqtisadçı qeyd edib ki, amma Rusiya tərəfinin də bu sanksiyalara qarşı öz alternativ planları olduğu görünür:
"Rusiya yaxın zamanda texnologiyalarla bağlı Çinlə əməkdaşlıq edəcəklərini və bu sahədə olan boşluqları doldurmağa çalışacaqlarını açıqlayıb. Məhz buna görə Rusiya Baş naziri Dmitri Medvedyev Pekinə rəsmi səfərə gedib. Orada bu məsələ ilə bağlı ciddi danışıqlar aparacağı gözlənilir”.
İqtisadçı vurğulayıb ki, Rusiya iqtisadiyyatında vəziyyət onsuz da yaxşı deyil:
"Həm enerji daşıyıcılarının qiymətinin düşməsi, həm sanksiya rejiminin 3 ilə qədər davam etməsi ilə əlaqədar iqtsadiyyatda ciddi problemlər yaşanıb. Bu sanksiyalar dərinləşdikcə gələcəkdə növbəti addım kimi maliyyə-bank sektoruna da sanksiyaların tətbiq edilməsi gözlənilir. Bu da baş versə, təbii ki, Rusiya iqtisadiyyatına böyük zərbə vurulmuş olacaq. Bazar oyunçuları da artıq bunu hiss edir. Təsadüfi deyil ki, son günlər neftin qiymətinin 60 dollara kimi qalxmasına baxmayaraq, rubl dollar qarşısında dəyərdən düşür. Bu da indiyə kimi görülməyən bir hadisədir. Çünki hər zaman neft bahalaşan kimi rubl da möhkəmlənirdi və rubla iqtisadi termin kimi "kağız neft” deyilirdi. Bu onu göstərir ki, bazar oyunçuları bu sanksiyaların Rusiya iqtisadiyyatına daha ciddi təsir etməsi və problemlərin yaşana biləcəyi ehtimalını nəzərdə tutaraq, əllərində olan aktivləri satmağa və onları dollara çevirməyə başlayıblar. Çünki hazırda Rusiyada dollara təlabat artır. Bunun nəticəsi olaraq da rubl dəyərdən düşür”.
Qeyd edək ki, ABŞ Maliyyə Nazirliyi Rusiyaya energetika sahəsində sanksiyaların necə tətbiq olunacağını açıqlayıb. Yeni sanksiyalara Rusiyanın potensial neft hasil etdiyi layihələr, eləcə də dəniz sularında Moskvanın gerçəkləşdirdiyi bütün neft layihələrinin məruz qalacağı bildirilib.
Xəbərdən istifadə edərkən istinad etmək vacibdir.
