Noyabrın 15-də Sumqayıt Dövlət Universitetində (SDU) Azərbaycan Xalq Cümhuriyyətinin 100 illik yubileyinə həsr olunmuş "İnformasiya sistemləri və texnologiyalar: nailiyyətlər və perspektivləri” mövzusunda beynəlxalq elmi konfrans işə başlayıb. Azərbaycan Milli Elmlər Akademiyasının (AMEA) İnformasiya Texnologiyaları İnstitutu ilə birgə keçirilən konfransa 300-dən çox tezis qəbul edilib və tədbirin materialları toplu şəklində nəşr olunub.
Xeberle.com xəbər verir ki, əvvəlcə konfrans iştirakçıları Sumqayıt şəhərində ulu öndər Heydər Əliyevin abidəsini ziyarət edib, önünə gül dəstələri qoyaraq, xatirəsini dərin ehtiramla anıblar.
Sonra qonaqlar universitetlə yaxından tanış olublar. Ali məktəbin rektoru, professor Elxan Hüseynovun iştirakı ilə "dəyirmi masa” ətrafında elmin, təhsilin inkişafına dair birgə əməkdaşlığın qarşılıqlı faydaları və perspektivləri barədə fikir mübadiləsi aparılıb.
Konfransda respublikamızda fəaliyyət göstərən alimlər və mütəxəssislərlə yanaşı, Türkiyə, Qazaxıstan və Rusiyanın bir sıra nüfuzlu ali məktəblərinin alimləri də iştirak edir.
Beynəlxalq konfransın plenar iclasını SDU-nun rektoru, Rusiya-Azərbaycan Universitetləri Assosiasiyasının Azərbaycan tərəfdən həmsədri, professor Elxan Hüseynov açaraq, ali məktəbin yaranma tarixi, fəaliyyət istiqamətləri, həyata keçirdiyi beynəlxalq proqram və layihələr barədə ətraflı məlumat verib. Qeyd edilib ki, davamlı olaraq universitetdə beynəlxalq, respublika səviyyəli tədbirlər keçirilir və bu, ikitərəfli münasibətlərin inkişafına böyük töhfələr verir.
Müasir dövr üçün aktual mövzuya həsr olunan beynəlxalq konfransın əhəmiyyətindən bəhs edən rektor bildirib ki, informasiya-kommunikasiya texnologiyaları əsrində yaşadığımız bir zamanda belə bir konfransın keçirilməsi çox vacibdir. Çünki sürətlə yeniləşmə, modernləşmə və yeni intellektual nəslin formalaşması üçün böyük imkanlar yaranıb.
Elxan Hüseynov diqqətə çatdırıb ki, Prezident İlham Əliyev tərəfindən ölkəmizdə İKT-nin inkişaf etdirilməsi üçün bir sıra sərəncamlar imzalanıb, Dövlət proqramları qəbul edilib, informasiya cəmiyyətinin bərqərar olması üçün zəruri islahatlar aparılıb. Eyni zamanda, müvafiq qanunvericilik bazası və texniki infrastruktur formalaşdırılıb, əlverişli investisiya mühiti yaradılıb. "Bunların nəticəsi kimi, Azərbaycan informasiya-kommunikasiya texnologiyalarının inkişafı reytinqində davamlı olaraq irəliləyir”, - deyən rektor dövlət idarəçiliyinin bütün səviyyələrində elektron xidmətlərin geniş yayılmasının şəffaflığı şərtləndirən başlıca cəhətlərdən biri olduğunu vurğulayıb.
Rektor konfransın işinə uğurlar arzulayaraq, Sumqayıt Dövlət Universitetində tədrisin elektronlaşdırıldığını və bu istiqamətdə ciddi işlərin aparıldığını bildirib.
Sonra Ufa Dövlət Neft Texniki Universitetinin rektoru, Rusiya-Azərbaycan Universitetləri Assosiasiyanın Rusiya tərəfdən həmsədri, akademik Ramil Baxtizinin konfrans iştirakçılarına ünvanladığı təbrik məktubu oxunub.
İnformasiya Texnologiyaları İnstitutunun direktor müavini, texnika üzrə fəlsəfə doktoru, dosent Rəşid Ələkbərov çıxışında ölkəmizdə informasiya cəmiyyəti quruculuğu istiqamətində aparılan işlərdən, həyata keçirilən islahatlar və tədbirlərdən danışıb. "Azərbaycan Respublikasında informasiya cəmiyyətinin inkişafına dair 2014-2020-ci illər üçün Milli Strategiya”dan da söz açan R.Ələkbərov bildirib ki, əsas məqsəd ölkədə informasiya cəmiyyətinin bərqərar olması, onun yaratdığı imkanlardan vətəndaşların, cəmiyyətin, dövlətin inkişafı üçün səmərəli istifadə edilməsi, davamlı və dayanıqlı tərəqqinin təmin edilməsində iqtisadi sektor kimi İKT-nin rolunun artırılması, o cümlədən rəqabətədavamlı və ixracyönümlü İKT sənayesinin qurulması, İKT-ni geniş tətbiq etməklə, biliklər iqtisadiyyatına keçidin təmin olunmasını reallaşdırmaqdır.
Azərbaycan Texniki Universitetinin prorektoru, professor İlham Pirməmmədov İKT sahəsindəki perspektivlərdən danışıb, gələcəkdə səmərəli elmi axtarışların aparılması, innovativ elmi nəticələrin əldə olunması baxımından bu cür tədbirlərin əhəmiyyətini vurğulayıb.
AMEA–nın müxbir üzvü Ağasi Məlikov "Ehtiyatların idarə edilməsi sistemlərində kütləvi xidmət modellərinin tətbiqi: problemin vəziyyəti və inkişaf perspektivləri”, Atırau Neft və Qaz Universitetinin professoru Akmaral Jalqasbayeva "Qazaxıstan Respublikasında informasiya texnologiyaları (İT) sahəsi üzrə kadr hazırlığının vəziyyəti və problemləri”, Ufa Dövlət Aviasiya Texniki Universitetinin professoru Mixayl Verxoturov "Qeyri-qabarıq obyektlərin davamsız yerləşdirilməsinin optimallaşdırma məsələləri: No Fit Polyhedronun obyekt və diskret məkanlarında qurulmasının xüsusiyyətləri”, SDU-nun proseslərin avtomatlaşdırılması kafedrasının müdiri, professor Cavanşir Məmmədov "Ali təhsil müəssisəsinin texnoparkının idarəetmə bölmələrinin sistemotexniki layihələndirmə mərhələsində modelləşdirmə alətlərinin təşkili” mövzularında məruzə ilə çıxış ediblər.
Məruzələr ətrafında maraqlı diskussiyalar aparılıb.
Konfrans işini iki gün altı bölmə üzrə davam etdirəcək.
Beynəlxalq tədbir çərçivəsində Sumqayıt Dövlət Universiteti (SDU) ilə Atırau Neft və Qaz Universiteti arasında təhsil və elmi-tədqiqat sahələri üzrə əməkdaşlıq müqaviləsi, həmçinin SDU-nun fizika və elektroenergetika fakültəsinin elektromexanika kafedrası ilə Atırau Neft və Qaz Universitetinin istehsalatın avtomatlaşdırılması və informasiya texnologiyaları kafedrası arasında əlaqələrin qurulması ilə bağlı memorandum imzalanıb.
Xəbərdən istifadə edərkən istinad etmək vacibdir.
