Məlumdur
ki, Nazirlər Kabinetinin 17 noyabr 2017-ci il qərarına əsasən 2018-ci il
yanvarın 1-dən Azərbaycana idxal edilən minik avtomobillərinə tətbiq edilən
idxal gömrük rüsumu artılıb.
Xeberle.com xəbər verir ki, yeni qərara əsasən, mühərrikinin
silindrlərinin işlək hissəsinin həcmi 1500-1800 və 1800-3000 kubsantimetr arası
olan təzə minik avtomobilləri üçün rüsum hər kubsantimetrinə görə 0,70 dollar,
istismar olunmuş avtomobillər üçün isə 1,2 dollar olacaq. Bundan əvvəl isə bu
rüsumlar müvafiq olaraq 0,40 və 0,70 dollar idi.
1000-1500
kubsantimetr arası olan avtomobillər üçün isə rüsum dəyişməyib. Bu
kateqoriyalarda olan təzə minik avtomobilləri üçün 0,40 dollar, işlənmiş
avtomobillər üçün isə 0,70 dollar sabit qalıb.
Bəs bu artım maşın bazarına necə təsir
göstərəcək?
İqtisadçı
Natiq Cəfərli deyir ki, rüsumların artması maşın bazarında qiymət artımına səbəb
olacaq: "Rüsumların artımı avtomobillərin mühərrik həcmindən və qiymətindən, dəyərindən
asılı olaraq dəyişəcək. Ən aşağı həcmli mühərriki olan avtomobillərə təqribən 1500-2000 AZN arası təsir göstərəcək, yuxarı
həcmli mühərrikli avtomobillərdə isə hətta 5000-6000 AZN-dən də yuxarı qiymət
artımı olacaq. Bu,
maşın mazarında təbii ki, ilkin hallarda qiymət artımına səbəb olacaq. Amma
qiymət artımı ilə paralel olaraq müştəri çatışmazlığı yaranıb. Bazarda demək
olar ki, müştəri yoxdur. Müştərilərin azalması, qiymətlərin artması bu
biznes ilə məşğul olanları çox pis
duruma salıb. İstənilən halda qiymətlərin
artması insanların çox az bir qismində avtomobil almaq həvəsi yaradacaq.
Banklar uzun müddətdir ki, avtomobil kreditləri vermir. Bank kreditlərinin
olmaması bu bazarda ciddi durğunluq yarada bilər. Əslində qəribə bir mənzərə
yaranacaq, qiymətlər artacaq, müştəri bazardan daha da uzaqlaşacaq. Bu artımın bazara müəyyən psixoloji təsirləri
də olacaq. Çoxdan ölkəmizdə olub, hazırda işlədilən avtomobillər isə bazara
çıxarıldıqda, qiymət artımının psixoloji təsirləri onları satan insanlarda
avtomobillərin üzərinə daha baha qiymət qoymağa sövq edəcək. Banklar yenidən
avtomobil kreditləri verməyə başlamasalar, maşın bazarındakı ölü vəziyyət,
durğunluq uzun müddət davam edəcək”.
Elnarə Salamova
Xeberle.com
Xəbərdən istifadə edərkən istinad etmək vacibdir.
