"Dövriyyəyə yeni buraxılan iri nominallı pulların devalivasiya ilə birbaşa əlaqəsi yoxdur. Çünki bizdə məzənnə inzibati qaydada tənzimlənir və üzən məzənnə rejimində deyil”.

Bu sözləri Xeberle.com-a açıqlamasında iqtisadçı-ekspert Natiq Cəfərli yeni 200 manatlıq əskinasların dövriyyəyə buraxılmasına münasibət bildirərkən qeyd edib. O ehtimal edib ki, yeni əskinasların dövriyyəyə buraxılmasının səbəbi büdcəyə ediləcək növbəti dəyişikliklərlə bağlı ola bilər: "Nəhayət ki, Mərkəzi Bank öz israrından əl çəkib son açıqlamalarında daha "üzən məzənnə” sözünü işlətmir. Məzənnə inzibati olduğu üçün 200 manatlıqların dövriyyəyə buraxılmasının devalivasiya ilə birbaşa əlaqəsi yoxdur. Amma psixoloji təzyiqləri var. Manat kütləsi, dövriyyədə olan manatın həcmi artdıqca təbii ki, həm inflyasiya basqılarını artırır (yəni qiymətlərin qalxmasına səbəb olur), həm də manata psixoloji basqı yaradaraq məzənnənin aşağı düşməsinə səbəb olur. Azərbaycanda manatın məzənnəsi daha çox neftdən asılıdır. Neftin qiymətləri hələlik kifayət qədər yüksək - 80 dollardır. Azərbaycan rəsmiləri heç bu qiyməti gözləmirdilər və bu onlara böyük, xoş bir sürpriz oldu. Ona görə də neftin qiymətinin aşağı düşməsi, məzənnənin dəyişməsinə daha çox təsir göstərəcək, nəinki 200 manatlıq əskinasların dövriyyəyə buraxılması. Mənə elə gəlir ki, bunun səbəbi büdcəyə ediləcək növbəti dəyişiklikdir. İyun ayının əvvəlində büdcəyə dəyişiklik olunacaq və təqribə 4 milyard manata yaxın büdcənin xərc hissəsi artırılacaq. Bu xərc hissəsi artdıqca büdcənin xərcləmələrini daha rahat aparmaq üçün (çünki Azərbaycanda çox təəssüf ki, büdcə layihələri də nəğd şəkildə həyata keçirilir) daha çox pul kütləsinə ehtiyac yaranacaq və pul kütləsini də təmin etmək üçün 200 manatlıqların dövriyyəyə buraxılmasına qərar verilib. Amma bir müddət sonra, pul kütləsi artıqca bu, istər-istəməz manatın məzənnəsinə təsir göstərməyə başlayacaq və manatın ucuzlaşmasının şahidi olacağıq. Sosial şəbəkələrdə yayılır ki, 100 dolları 200 manat əvəz edəcək, lakin bunun əlaqəsi yoxdur”.