Bu ilin yanvar-sentyabr aylarında Bakı şəhərində "Norm” sement zavodu, Dövlət Sərhəd Xidmətinin Sahil Mühafizəsinin yeni gəmi inşası zavodu, Milli Konservatoriyanın yeni inzibati-tədris kompleksi, Yeni Bakı Beynəlxalq Dəniz Ticarət Limanı Kompleksinin birinci mərhələsi çərçivəsində bərə terminalı kimi mühüm obyektlər istifadəyə verilib.
Dövlət Statistika Komitəsindən Azertac-a bildiriblər ki, həmin dövrdə tikintisi başa çatdırılan obyektlərin siyahısına Azərbaycan Milli Elmlər Akademiyası Mərkəzi Kitabxanasının və "Azərbaycan Milli Ensiklopediyası” Elmi Mərkəzinin yeni binaları, respublika İdman, Tibb, Diaqnostika və Reabilitasiya İnstitutunun binası, Suraxanı Günəş Elektrik Stansiyası, sağlamlıq mərkəzi, milli gimnastika kompleksi, müxtəlif səviyyəli yol qovşaqları da daxildir. Eyni zamanda Naxçıvan Muxtar Respublikasında "Arpaçay-2” Su Elektrik Stansiyasının, su anbarı və sutəmizləyici qurğular kompleksinin, gənclər mərkəzinin, Sumqayıt şəhərində kağız və karton kombinatının, yağ fabrikinin, mis emalı zavodunun, Gəncə şəhərində isə metaltökmə və fasiləsiz yayma,
təzyiqlə emal və boyama zavodlarının tikintisi başa çatdırılıb.
Bundan əlavə, Şirvan şəhərində Kür çayı üzərində körpü, Ağdaş rayonunda yem və meyvə emalı zavodları, elektrik yarımstansiyası, Beyləqan rayonunda şahmat məktəbi, şəhər stadionu, Füzuli rayonunda tikiş fabriki, Göygöl rayonunda olimpiya idman kompleksi, gənclər mərkəzi, Qəbələ rayonunda "Tufan” Dağ-Xizək Yay-Qış İstirahət Kompleksinin birinci mərhələsi, "Qafqaz Yengicə Termal Hotel və SPA” otel kompleksi, Lənkəran rayonunda çörək istehsalı zavodu, Şamaxı rayonunda "Şamaxı Palace Platinum By Rixos” oteli, həmçinin ayrı-ayrı rayonlarda kəndlərarası avtomobil yolları, məktəb binaları, tibb və mədəniyyət müəssisələri, yaşayış sahələri və digər obyektlər də istifadəyə verilib.
Cari ildə inşasının davam etdirilməsi məqsədəuyğun sayılan obyektlərin tikintisinin aparılması üçün dövlət büdcəsində nəzərdə tutulmuş 5,5 milyard manat vəsaitin 4 milyard manatından istifadə olunub.