Dövlət Neft Şirkətinin əsas hədəfi müasir Avropa standartlarına uyğun yanacağın istehsal edilməsidir.

İnterAz xəbər verir ki, bunu ARDNŞ-nin Emal üzrə vitse-prezidenti David Məmmədov Bakıda keçirilən II Neft-Qaz və Neft-Kimya Komleksi forumunda bildirib.

Onun sözlərinə görə, bu istehsala nail olduqdan sonra Azərbaycan mazut istehsalından tamamilə imtina edəcək.

Hazırda Azərbaycan əhalisinin 90%-nin təbii qazla təmin edildiyini söyləyən vitse-prezident qeyd edib ki, prezident İlham Əliyevin tapşırığına uyğun olaraq, bununla bağlı işlər davam etdirilir: "Tapşırıq çərçivəsində bu rəqəmi 95%-ə çatdırmaq niyyətindəyik. Bu səbəbdən də ölkə daxilində mavi yanacağa böyük tələbat gözlənilir. Nəticədə ölkədə benizinin istehsalı kəskin artacaq, 2.4 milyon ton benzin və 2.7 milyon ton müasir dizel istehsal olunacaq ki, bu da ARDNŞ-nin Gürcüstan nümayəndəliyi və Gürcüstanın tələbatını qismən ödəyəcək."

Şirkət rəsmisi vurğulayıb ki, ölkədəki zavodların modernləşdirilməsindən sonra bütün yanacaqlar "Avro-5” ekoloji standartına cavab verəcək: "Ölkədə bu standarta uyğun istehsal olunacaq bitum və maye qaz istehsalı gələcəkdə ölkənin əsas tələbatını ödəyəcək. 354 min ton bitum istehsalı mazut istehsalının tamamilə dayandırılmasına səbəb olacaq. Bununla da Azərbaycan 2030-cu ilə qədər bütün növ yanacaqlara tələbatını tam şəkildə bağlayacaq. Bu inkişaf proqramı çərçivəsində ARDNŞ-nin inteqrasiya prosesləri davam edəcək və ölkədə neft emalının inkişafı neft istehsalı müəssisələrini davamlı xammalla təmin etməyimizə imkan verəcək. İnkişaf proqramı qəbul edildikdən sonra Heydər Əliyev adına Bakı Neft Emalı Zavodunun icra qrafiki əsasında tam müasir standartlara uyğun yanacaq istehsalı təşkil ediləcək, neft və yanacaq daşıyıcılarına olan tələbat tam bağlanacaq.