"Təşkilatımızın daha sadə və səmərəli olması lazımdır”.

BP-nin Azərbaycanda icraçısı olduğu layihələr uzun-müddətli və çox əhəmiyyətli layihələrdir. BP bu layihələrlə bağlı öhdəliklərinə sadiqdir və onlara əməl etməkdə davam edəcək. Bu layihələr uğurla irəliləyir və bundan sonra da planlara uyğun şəkildə davam edəcək.

Bu barədə BP Azerbaijan şirkətinin mətbuat xidmətinin rəhbəri Tamam Bayatlı bildirib.

Qeyd edək ki, bundan əvvəl "The Guardian”-a açıqlama verən BP şirkətinin icraçı direktoru Robert Dadli neftin azalmaqda olan qiyməti ilə əlaqədar şirkətin ABŞ, Böyük Britaniya, Almaniya və Azərbaycandakı bölmələrində ixtisarlar aparılacağını bildirmişdi.

Tamam Bayatlı BP Azerbaijan-da ixtisarlar aparılacağını birbaşa söyləməsə də, dolayısı ilə təsdiqləyib:

"Bununla belə, aydındır ki, indiki mühitdə biz rəqabətqabiliyyətliliyimizi daha da artırmaq üçün imkanlara baxırıq, o cümlədən lazımsız mürəkkəblikləri aradan qaldırmaq və səmərəliliyi artırmaq imkanlarına baxırıq.  Bu imkanlar əsasən əməliyyat proseslərimizinin, təchizat fəaliyyətlərimizin və təşkilatımızın daha sadə və səmərəli olması istiqamətlərindədir. Təbii, bunlar biznes  fəliyyətinin tələblərinə uyğundur və bizim daha rəqabərqabiliyyətli olmağımızı təmin edəcək”.

Tamam Bayatlı həmçinin ixtisarların təhlükəsizlik və əməliyyatlar sahəsində olmayacağını da dolayısı ilə açıqlayıb:

"Bununla belə,  əsas diqqətimiz biznesin əsas sahələrindən, əməyin təhlükəsizliyi və obyektlərimizin və əməliyyatlarımızın etibarlılığını təmin etmək məqsədlərindən kənara yayınmayacaq. Bunlar bizim əsas diqqət sahələrimiz olaraq qalacaq. Bu, bizə imkan verəcək ki, təhlükəsiz və etibarlı biznes əməliyyatları aparmaqla yanaşı, biz həm də daha quclü və daha rəqabətqabiliyyətli olaq.”