"Azərbaycana idxal olunan mobil telefonlar müəyyən qeydiyyatdan keçməlidirlər. Buna görə də bu tip elektron ticarət qanun-qaydanın riayət olunmasında müəyyən problemlər yaradır. Bizim borcumuzdur ki, ölkədə qoyulan qanunu təmin edək”.
Bunu Azərbaycan Dövlət Gömrük Komitəsinin sədri Aydın Əliyev,Qabon Respublikasının iqtisadiyyat, investisiyaların təşviqi və planlaşdırma naziri yanında nazir-deleqat xanım Maria Julie Bloqo Bi Nzendonqun rəhbərlik etdiyi nümayəndə heyəti ilə keçirilən görüşdən sonra jurnalistlərə açıqlamasında bildirib.
DGK sədri, internet ticarətinin nəinki Azərbaycanda, hətta artıq bütün dünyada müəyyən problemə çevrildiyini diqqətə çatdırıb: "Bu ticarət artıq asan vasitəyə çevrilib. Bundan eyni zamanda vergilərdən yayınmaq üçün müəyyən "işbazlar” da istifadə edirlər. Ötən ilin dekabr ayında MDB ölkələrinin gömrük xidmətləri rəhbərlərinin Şurasının sonuncu iclasında da Rusiya gömrük xidmətinin təşəbbüsü ilə artıq bu problem arayış olaraq hazırlanıb. Arayışda bu ticarət növünün bir problem olaraq ortalığa gəlməsi, vergilərdən yayınması, müəyyən razılıq və lisenziyanın, qeydiyyat tələb olunan malların idxalı ilə bağlı və s. problem yaratdığı qeyd edilib”. (xezerinfo.az)
Xəbərdən istifadə edərkən istinad etmək vacibdir.
