"303 nəfər əmək xəsarəti alan sabiq işçilər də daxil olmaqla, Birlik üzrə ümumilikdə 3798 nəfər kimyaçı tibbi sığortaya cəlb olunub. Bağlanmış sığorta müqaviləsi və təqdim olunmuş kartlar üzrə kimyaçılar respublikanın müxtəlif şəhərlərində olan 40-a yaxın ixtisaslaşdırılmış klinikalarında, o cümlədən Sumqayıtın üç sağlamlıq ocağında istənilən vaxt heç bir məhdudiyyət olmadan pulsuz təcili tibbi yardım, təcili tibbi daşınma və evakuasiya, stasionar yardım, ambulator poliklinik yardım, təcili və planlı stomatoloji yardım, hamiləliyin təqibi və doğuş, illik dövri tibbi müayinə, təcili vaksinasiya, müxtəlif cərrahi müdaxilələr və digər xidmətlərdən istifadə edə bilirlər. Bu müqaviləyə əsasən hər bir kimyaçı il ərzində 50 min manat həcmində müayinə və müalicə almaq hüququna malıkdir.”
Bu barədə Xeberle.com-a "Azərikimya” İstehsalat Birliyinin Mətbuat xidmətinin rəhbəri Rafiq Oday məlumat verib. R. Oday bildirib ki, yaşa və əlilliyə görə, həmçinin güzəştli şərtlərlə təqaüdə çıxmış 150 nəfərə yaxın sabiq işçi Mərkəzi Neftçilər Xəstəxanasında tibbi xidmətdən istifadə etmək üçün qeydiyyata alınıb. Ötən il klinikalara 1000 nəfərdən artıq kimyaçı müraciət edib, təkrar müraciətlər də daxil olmaqla, ümumi müraciətlərin sayı 8000-dən yuxarı olub: "İl ərzində "Azərikimya” nın əməkdaşları üzərində 5 aorta-koronar şuntlama və 5 stentləmə əməliyyatı, 3 anjuqrafiya, 11 doğuş və keysəriyyə, 122 müxtəlif ümumi cərrahi əməliyyatlar aparılıb və digər tibbi müayinə və müalicə xidmətləri göstərilib.” Qeyd edək ki, "Paşa Sığorta” ASC-nin klinikalarda fəaliyyət göstərən xüsusi şöbələri tərəfindən həftənin 7 günü, günün 24 saatı ərzində əməkçilərin müraciətləri qəbul olunur, vaxt itirmədən müraciətlərin istiqamətinə uyğun olaraq təcili tibbi yardım maşını və tibb briqadası ayrılaraq ünvana göndərilir. Kimyaçılarımız tibbi sığortadan yetərincə yararlana bildiklərinə görə bu işin "Azərikimya” İB-də yüksək səviyyədə təşkilindən məmnundurlar.”
Xəbərdən istifadə edərkən istinad etmək vacibdir.
