Trans Anadolu Qaz Boru Kəmərinin (TANAP) təməlinin qoyulacağı vaxtı açıqlanıb.

Bu barədə Türkiyənin energetika və təbii sərvətlər naziri Taner Yıldız yerli boru istehsalçıları ilə görüşündə məlumat verib.

Təməlqoymanın yeri artıq məlumdur. Nazirin sözlərinə görə, gecikmə olmayacağı təqdirdə 17 mart tarixində Qarsda prezidentlər səviyyəsində TANAP-ın təməli qoyulacaq.

Taner Yıldız qeyd edib ki, bununla da TANAP-ı bir daha bölgəyə və dünyaya elan etmiş olacağıq.

Qeyd edək ki, Trans Anadolu Qaz Boru Kəməri təbii qazı Türkiyənin Şərq sərhədindən Qərb sərhədinə daşıyacaq, bütün ölkədə sabit tranziti təmin edəcək. Layihə Azərbaycandan başlayan genişlənmiş Cənubi Qafqaz boru kəmərini Avropa Birliyində bir neçə kəmərlə əlaqələndirəcək. 5 il ərzində reallaşması nəzərdə tutulan layihənin dəyəri 7 mlrd. ABŞ dollarıdır.

Dörd mərhələdə həyata keçiriləcək layihənin ilk mərhələsi 2018-ci ildə başa çatacaq. 2020-ci ildə kəmərin buraxılış qabiliyyəti ildə 16 mlrd., 2023-cü ildə 23 mlrd., 2026-cı ildə isə 31 mlrd. kubmetrə çatdırılacaq. İlk dövrdə TANAP kəməri ilə nəql olunacaq 16 mlrd. kubmetr Azərbaycan qazının 10 mlrd. kubmetri Avropaya, 6 mlrd. kubmetri isə Türkiyəyə satılacaq. Avropa üçün nəzərdə tutulan qaz Türkiyə-Bolqarıstan və ya Türkiyə-Yunanıstan sərhədində təhvil veriləcək.

TANAP layihəsi üzrə saziş 2012-ci il iyunun 26-da İstanbulda imzalanıb. Boru kəmərinin diametri 56 düym və ya 1,4 metr nəzərdə tutulub. TANAP layihəsinin işə düşməsi Şahdəniz-II layihəsi üzrə qaz hasilatına başlanması vaxtı ilə uzlaşdırılıb və 2017-ci il üçün nəzərdə tutulub.  (anspress.com)