İsveçrə frankının kursunun avroya nisbətdə dəyişməsi SOCAR-ın bu ölkədə yanacaqdoldurma məntəqələri şəbəkəsinə malik olan törəmə şirkəti "SOCAR Geneva”nın biznesinə zərbə vurub.

Bu haqda şirkətin icraçı direktoru Edqar Bahman İsveçrənin "Blick” qəzetinə müsahibəsində deyib.

Qəzetin yazdığına görə, hazırda İsveçrədəki "SOCAR” brendli yanacaqdoldurma məntəqələrində müştərilərə pulsuz qəhvə təklif edirlər. Məqsəd frankın kursunun dəyişməsindən sonra müştəriləri cəlb edə bilməkdir.

"Yanvarın ortalarından etibarən tətbiq edilən yeni kurs SOCAR üçün böyük problemlər yaratdı. Bir çox müştərilər gözlənilmədən yoxa çıxdılar. Bizim müasir yanacaqdoldurma məntəqələrimiz var. Ancaq müştərilərimizin təxminən üçdə birini itirmişik. Onlar qiymətlərin dəyişməsinə həssas müştərilərdir, maşınlarının yanacaq çənlərini xaricdə avro ilə doldurmağa üstünlük verirlər”- deyə menecer bildirib.

Edqar Bahman deyib ki, indi SOCAR yanacaqdoldurma məntəqlərində müştəriləri cəlb etmək üçün müxtəlif aksiyalar təşkil edirlər. Onun bildirdiyinə görə, SOCAR-ın yanacaqdoldurma məntəqələri əsasən sərhədə yaxın yerləşdiyi üçün müştərilər sərhədi keçib avro ilə daha ucuz başa gələn yanacaq alırlar. Hazırda SOCAR-da satış 50 faizə qədər azalıb.

Buna baxmayaraq Edqar Bahman deyib ki, SOCAR İsveçrədə yanacaqdoldurma məntəqələrinin sayını artırmağa hazırlaşır. Hazırda SOCAR-ın bu ölkədə 150-dən çox yanacaqdoldurma məntəqələri var. Şirkət bu il daha bir nüçə müstəqil yanacaqdoldurma məntəqələrini alaraq onların sayını artırmağa hazırlaşır.

"SOCAR Geneva”nın icraçı direktorunun bildirdiyinə görə, SOCAR hazırda "Tamoil” yanacaqdoldurma məntəqələri şəbəkəsinə maraq göstərir. Bu, 300-dən çox yanacaqdoldurma məntəqəsinə sahib olan və İsveçrənin ən iri pərakəndə yanacaq satışı şirkətidir.

"Lakin hazırda şirkət satılmır. Beləliklə, biz başqa rəqibləri almaq barədə fikirləşirik”- deyə E.Bahman bildirib.

Xatırladaq ki, SOCAR 2012-ci ilin iyulunda  ABŞ-ın "ExxonMobil” şirkətindən "Esso Schweiz GmbH” biznesini, o cümlədən yanacaqdoldurma və texniki xidmət stansiyaları şəbəkəsini satın alıb. 2013-cü ilin ortalarından "Esso”nun İsveçrə ərazisindəki 160 yanacaqdoldurma stansiyası bütövlükdə SOCAR premium-brendi altında fəaliyyət göstərməyə başlayıb.  (Virtualaz.org)