Respublika Gigiyena və Epidemiologiya Mərkəzi Ekologiya və Təbii Sərvətlər Nazirliyi ilə birlikdə çimərliklərdə yoxlamalar aparıb. Yoxlamalar nəticəsində Qaradağ və Səbayel rayonları ərazisindəki çimərliklərdə bakterioloji çirklənmə müşahidə edilib. Ancaq buna baxmayaraq, həmin ərazilərdə insanlar bu çimərliklərdən istifadə edir.
Mərkəzin şöbə müdiri Ziyəddin Kazımov APA TV-yə açıqlamasında bildirib ki, may ayından çimərlik ərazilərində dəniz suyunun keyfiyyət göstəricilərinə nəzarət məqsədilə laboratoriya-tədqiqat üsullarının tətbiqi ilə tədqiqatlara başlanılıb. Yekun nəticəyə görə, Sahil və Şıx çimərliklərində məişət suları ilə dəniz suyunun çirklənməsi aşkar olunub. Həmin ərazilərdə isə bakterioloji çirklənmə normadan dəfələrlə çoxdur: "Bizə daxil olmuş məlumatlarda hər iki ərazidə aparılmış tədqiqatların nəticələrinə görə bu ərazilərdə vətəndaşlar səmərəli istirahət edə bilər.
Sumqayıt şəhərinin Baş Dövlət Sanitar həkiminin qəbul etdiyi qərar da qüvvədə qalır. Çünki bu ərazilərdə Sumqayıt ərazisində də bakterioloji çirklənmə müşahidə olunur".
Neçə illərdir analoji vəziyyətin təkrarlandığını bildirən şöbə müdiri əlavə edib ki, həmin ərazilərdə təmizləyici qurğular tikilməlidir: "Artıq dövlət proqramı mövcuddur. Dövlət proqramına müvafiq olaraq həmin ərazilərdə ya təmizləyici qurğular tikilib istifadəyə verilməlidir, ya da oradakı təmizləyici qurğularda tam təmir-təftiş işləri aparılmalıdır ki, burada birbaşa yaşayış məntəqələrindən axıdılan çirkab sular təmizlənərək dənizə axıdılsın. Lakin əfsuslar olsun ki, bu dediyim qurğulardan istifadə olunmur. 2010-cu ilə qədər belə halları Mərdəkan və Şüvəlan çimərliyində, Binəqədi rayonu və Corat qəsəbəsi ərazisində müşahidə edirdik. Lakin bu dövlət proqramı verilmiş tapşırıqların icrası nəticəsində Ekologiya və Təbii Sərvətlər Nazirliyi həmin ərazilərdə modul tipli təmizləyici qurğular yerləşdirib ki, burada mərkəzləşdirilmiş formada həmin axıntıların qarşısı alınır".
Ziyəddin Kazımov bildirib ki, özəl sektora mənsub olan sahələrdə çimərlik mövsümünə hazırlıq işləri tam başa çatdırılıb və bu gün istifadə olunur. Ancaq dövlət sektorunda olan ərazilərdə məişət tullantılarına və digər tullantılara rast gəlinir: "Vətəndaşlar özləri sanitar gigiyenik qaydalarını gözləməlidir ki, biz də digər dövlət orqanlarından tələb edək ki, bu ərazilərdə bu işlər aparılsın. Biz qəbul etdiyimiz qərarı Bakı Şəhər İcra Hakimiyyətinə göndəririk ki, hər bir dövlət orqanı öz səlahiyyəti daxilində müvafiq tədbirlər həyata keçirsin".
Çəkiliş qrupumuzla birlikdə çimməyə qadağa qoyulan bir neçə ərazidə olduq. Belarusda yaşayan həmyerlimiz Asəf Babayev deyir ki, Azərbaycana 3 gündür gəlib və hər gün də dənizə gedir. Onun fikrincə, özəl sektorlarda vəziyyət ürək açan olsa da, digər pulsuz ərazilərdə mənzərə heç də ürək açan deyil: "Burada harada pulsuz zonadır, orada narahatdır. Pulsuz çimərliklər çox bərbad vəziyyətdədir. Özünüz görürsünüz zibillikdir, amma pullular çox təmizdir. Biz burda çimməyin qadağan olduğunu bilmirdik. Onu bizə burada deyən yox idi, xəbərdarlıq üçün heç bir işarə yoxdur. Olsaydı, biz bura gəlməzdik. Çox sağ olun ki, siz bizə xəbərdarlıq elədiniz. Gərək dövlət nümayəndələri kimsə burada nişan qoymalı idi ki, burada çimmək olmaz. Burada heç kəs heç kimlə maraqlanmır. Kasıblar gəlib tökülüşüb bura. Belarusda hər yerdə işarələr var millət özü başa düşür və həmin ərazilərə getmirlər. Biz istəyirik zibil tullayaq, ətrafda zibil qabı yoxdur".
Asəf Babayev deyir ki, Belarusda metro stansiyalarının ətrafında çimərliklərə getmək istəyən vətəndaşlar üçün avtobuslar ayrılır və avtomobili olmayan insanlar da çimərliyə rahatlıqla gedə bilir. Ölkəmizdə isə bu avtobuslara rast gəlmək mümkün deyil: "İnsanların maddi çətinliyi var. Mənim öz maşınım var, mən gedirəm, amma elə şərait yaratmalıdırlar ki, Belarusda belədir yay mövsümündə, avtobuslar ayrılır. Hər kəsin maşını yoxdur. Çimərliklərə marşrut olsun ki, həmin təmiz çimərliklərə gedə bilsinlər".
Özəl istirahət mərkəzinin inzibatçısı Dilavər Cənnətov deyir ki, əvvəlki illərə nisbətən bu il çimərliyə gələnlərin sayı çox azdır. Çimərliyə gələnlər əsasən Rusiyadan gələn turistlərdir, yerli əhali demək olar ki, gəlmir. Qadağan olmuş bu ərazilərdə insanların çimməyinə gəlincə, inzibatçı bildirib ki, "çimmək qadağandır!" nişanları hər yerə vurulub: "Hələlik bu il elə bir məlumat almamışıq. Suyu analiz edirlər, onun nəticəsində qərar verirlər. Hələ ki, bu il elə bir məlumat daxil olmayıb. Yazılı surətdə məlumat verməyiblər. Biz hər dəfə hər il olduğu kimi, yenə qadağa işarələrimizi qoyuruq, yazıb məlumatlandırırıq. Amma əsasən onlar dənizdə çimməyə yox, günəşlənməyə gəlirlər".
Özəl sektorlarda dincələn sakinlərə elə gəlir ki, bura pulludursa, deməli, su təmizdir. Bura gələnlərin demək olar ki, əksəriyyəti məlumatsızdır: "Şərait yaxşıdır burada, dəniz də yaxşıdır, təmizdir burda. Hava da gözəldir. Sözün düzü, məlumatım yox idi orada yazını oxudum. Mənə də bir az müəmmalı gəldi. Orda oxudum ki, çimərlik qadağandır. Görməmişdim. Artıq iş işdən keçmişdi. Bundan sonra nəzərə alarıq".
Məsələ ilə bağlı Bakı Şəhər İcra Hakimiyyəti ilə də əlaqə saxladıq. Həmin ərazilərdə nişanların olmamasının səbəbini öyrəndik. Bakı şəhər Ticarət və Xidmət Departamenti mətbuat xidmətinin rəhbəri Əliabbas Bağırov bildirdi ki, bu barədə onlara Gigiyena və Epidemiologiya Mərkəzindən heç bir məlumat daxil olmayıb. Amma yaxın günlərdə çimmək qadağan olunmuş ərazilərə qadağanedici nişanlar vurulacaq.
Xəbərdən istifadə edərkən istinad etmək vacibdir.
