"Bu il 1 oktyabr Ahıllar günü və Qurban bayramında kimsəsiz və tənha qocalara, aztəminatlı ailələrə yardım etmək üçün rəhbərlik etdiyim Qızıl Aypara Cəmiyyətinin Sumqayıt şəhər şöbəsinin adından 77 təşkilata rəsmi müraciət etdik. Müraciət məktubuna Prezident sərəncamı və şəhər rəhbərliyini qərarı da əlavə edilmişdi. Bu təşkilatlar arasında Sumqayıtda fəaliyyət göstərən banklar, şadlıq sarayları və böyük ticarət obyektləri var idi. Təəssüflər olsun ki, bu müraciətimizə 5 təşkilat müsbət cavab verdi və xeyirxah aksiyaya öz töhfələrini verdilər.”

Xeberle.com-un məlumatına görə, bu sözləri Qızıl Aypara Cəmiyyətinin Sumqayıt şəhər şöbəsinin sədri Mətanət Məhərrəmova "Mərhəmətli olmağa tələsin” aksiyası ilə bağlı keçirilən tədbirdə çıxışı zamanı deyib. M. Məhərrəmova bildirib ki, rəhbərlik etdiyi şöbənin xoş məramına "Sumqayıt Ticarət Mərkəzi”, "Ordubad” marketi, "Savalan”, "Bəyaz saray” şadlıq sarayları və "Real” Tibb Mərkəzi dəstək verib. Xeyirxah missiyalarının həyata keçirilməsinə yardım etdiklərinə görə sözügedən təşkilatlara öz minnətdarlığını bildirən M. Məhhərəmova öz təəssüfünü də gizlətməyib: "Sumqayıt kimi günü-gündən inkişaf edən şəhərdə fəaliyyət göstərən təşkilatların çox hissəsi bir imkansızı sevindirməyi bizdən əsirgədilər. Yəni şəhərdə fəaliyyət göstərən böyük ticarət obyektlərinin 3 imkansıza belə yardım etməyə pulu yoxdur?  Bu şəhərdə qazanıb onun quruclarına qıymırlar. Utandırıcı haldır.”

Rəhbərlik etdiyi şöbənin fəaliyyətindən söz açan M. Məhərrəmova oktyabr ayında həyata keçirilən tədbirlər çərçivəsində bir sıra insanlara yardım etdiklərini də qeyd edib:"Ahıllar günündə 200, Qurban bayramında isə 375 nəfərə humanitar yardım göstərildi.”

Qeyd edək ki, tədbirdə Qızıl Aypara Cəmiyyətinin Sumqayıt şəhər şöbəsinə dəstək olan bir sıra təşkilatlar Fəxri fərmanlarla mükafatlandırıldı.

R. Zeynallı/Xeberle.com