Bolqarıstan və ukraynalı rejissorlar Hristo Stoyçevlə Arkadiy Neputaliuk Hüseyn Ərəblinski adına Sumqayıt Dövlət Musiqili Dram Teatrının qonağıdırlar. Xeberle.com məlumat verir ki, hər iki rejissor Sumqayıta teatrın direktoru İslam Həsənov tərəfindən dəvət ediliblər.
Hristo Stoyçev Bolqarıstanın Kardjaliy şəhərinin "Dimitov Dimov”and "Kadrie Latifova” teatrının baş rejissorudur. Budəfəki səfərini Sumqayıt teatrının kollektivi ilə yaxından tanışlığa həsr edən rejissor yeni ilin may ayında təkrar Sumqayıta gələcək. H.Stoyçevin rejissorluğu ilə teatrın səhnəsində Şekspirin "Otello” faciəsi səhnələşdiriləcək. Bu barədə mətbuatda məlumat yayıldıqdan sonra həm yerli, həm də xarici teatr menecerləri artıq layihə ilə maraqlanmağa başlayıblar. Böyük maraqla layihənin həyata keçməsini gözləyirlər.
Ukraynalı rejissor Arkadiy Neputaliuk isə hazırda teatrda Qoqolun "Ölü canlar "əsərinin motivləri əsasında səhnələşdirilən "Çiçkovun sərgüzəştləri” tamaşasının quruluşçu rejissorudur. Tamaşanın noyabrın sonunda hazır olacağı gözlənilir. Oqtay Mehtiyev, Cəlal Məmmədov, Namis Şirməmmədov və digər aktyorların rol aldığı tamaşaya sumqayıtlılar dekabrın əvvəlində baxa biləcəklər.
Hər iki qonaq indiyədək Bakı və Lənkəran şəhərlərində olsalar da, Sumqayıta ilk dəfədir ki, gəliblər.
A.Neputaliuk bizimlə söhbətində işin çoxluğundan Sumqayıtda gəzintiyə çox çıxa bilmədiyindən təəssüfləndiyini dilə gətirdi. Buna baxmayaraq, az vaxt ərzində Sumqayıtı tanımaq fürsətini qaçırmadığını qeyd etdi. Şəhər açıqlıqdır, küçə və meydanları da genişdir. Ukraynanın şəhərlərindən fərqli olaraq, burada evlər bir-birindən aralıdır. Yaşayış binaları arxitekturasına görə sadə və maraqlıdır. Bu, kimlərinsə zövqünə uyğun gəlməyə bilər. Amma öz adımdan deyə bilərəm ki, bu, mənim çox xoşuma gəldi.
Ukrayna teatrından fərqli olaraq, Sumqayıt teatrındakı çalışmalarından başqa bir zövq aldığını bildirən A.Neputaliuk aktyorlarla münasibətindən məmnun qaldığını da qeyd etdi.

Aytən Əli
Xeberle.com