Nizami İsgəndərov "Nabran Holiday Village" istirahət mərkəzinin ardından Sumqayıtdakı obyektlərini də satmağa hazırlaşır?

 Sumqayıtın sabiq deputatı Nizami İsgəndərov Sumqayıt şəhərinin tanınmış iş adamlarından biridir və "Nabran Village Holiday" istirahət mərkəzi ilə yanaşı "Cavid" və "Sumqayıt" ticarət mərkəzlərinin sahibidir. Onun atası Zaman İsgəndərov isə Sumqayıtda "Univermaq Zaman" kimi tanınır. Qalmaqallı istirahət mərkəzinin 3 milyon manata satıldığı deyilir. "Gündəlik Bakı" qəzetinin məlumatına görə, sabiq deputat Nizami İsgəndərov "Nabran Holiday Village" istirahət mərkəzi ilə yanaşı, Sumqayıtda fəaliyyət göstərən digər obyektlərini də satıb xaricə yerləşmək və orada biznes qurmaq haqda fikirləşir. Əsasən məlum hadisədən sonra başı bərk ağrayan keçmiş deputat biznesini xaricə köçürərək həm özünü sığortalamaq, həm də söz-söhbətlərdən uzaq qalmaq istəyir: "Zaman İsgəndərovun oğlunun Sumqayıtda bir neçə iri ticarət obyekti var. Nizami İsgəndərov atasının razılığı ilə xarici ölkələrdən birində, deyilənə görə İngiltərədə biznes fəaliyyətini davam etdirmək niyyətindədir. Bu məqsədlə hətta sabiq deputatın Londonda yaşayan dostlarından biri ilə təmasa keçdiyi və ondan bəzi məsləhətlər aldığı deyilir".

Məsələ ilə bağlı qarşı tərəfin mövqeyini işıqlandırmağa hazırıq.