Artıq Sumqayıt Gənclər evinin tikintisi başa çatıb. Sumqayıt gəncləri isə evin nə zaman açılıb onların ixtiyarına veriləcəyi günü maraqla gözləyirlər.

Gənclər və İdman nazirliyi mətbuat xidmətinin katibi Səmayə Məmmədovanın Xeberle.com-a verdiyi məlumata görə, Gənclər evində son tamamlanma işləri gedir. Açılış 2015-ci ilin fevral ayının sonu, ya da mart ayının əvvəlində olacaq.

Gənlər evində gənclər asudə vaxtlarını maraqlı keçirmələri üçün onlara lazım olan bütün imkanlardan istifadə edə biləcəklər. Kompüter mərkəzində pulsuz yüksək sürətli internet xidmətindən maksimum yararlana biləcəklər. Bundan başqa Gənclər evində konfrans zalı, kitabxana, trenajor və fitnes zalları da olacaq.

Gənclər evi Gənclər və İdman Nazirliyinin sifarişi əsasında tikilib. Məqsəd gənclərin özlərini bir şəxs kimi müəyyən etməsi və özünü reallaşdırması, gənclərin təşəbbüslərinin dəstəklənməsi, inkişaf etdirməsinə yardım göstərməkdir.

Gənclər evinin qapısı təhsilindən və peşəsindən asılı olmayaraq bütün gənclərin üzünə açıq olacaq.

Aytən, Xeberle.com