Bildiyiniz kimi, Azərbaycan Respublikasının idman mütəxəssislərinə fəxri adların verilməsi haqqında Azərbaycan Respublikası Prezidenti İlham Əliyev Sərəncam imzalayıb. Sərəncama əsasən Azərbaycanda bədən tərbiyəsi və idmanın inkişafında xidmətlərinə görə bir sıra şəxslərə "Əməkdar Bədən Tərbiyəsi və İdman Xadimi” fəxri adı verilib.

Fəxri ad alanlar arasında uzun müddət Sumqayıt şəhər Gənclər və İdman Baş İdarəsinin rəisi vəzifəsində çalışan Musa Süleyman oğlu Həsənov da var. O, təxminən 1 ay öncə öz ərizəsinə əsasən tutduğu vəzifədən azad edilib. Hazırda isə dekabrın 23-də keçiriləcək bələdiyyə seçkilərində Yeni Azərbaycan Partiyasının Sumqayıt şəhər təşkilatından bələdiyyə üzvlüyünə namizəddir.

Qeyd edək ki, M.Həsənov 1963-cü ildə Kəlbəcər rayonunda anadan olub. 1993-cü ildə Bakı Dövlət Universitetinin Hüquqşünaslıq fakültəsini bitirib. 1984-cü ildə Sumqayıt Superfosfat zavodunda əmək fəaliyyətinə başlayıb. 1988-1991-ci illərdə Superfosfat zavodunda Komsomol Komitəsinin katibi vəzifəsində işləyib. 1991-1994-cü illərdə Azərbaycan Gənclər İttifaqı Sumqayıt şəhər Məclisinin Təşkilat şöbəsinin müdiri və məclisin sədri seçilib. 10 dekabr 1994-cü ildən Baş İdarənin rəis müavini, 1997-2014-cü illərdə Sumqayıt şəhər Gənclər və İdman Baş İdarəsinin rəisi vəzifəsində işləyib.

Xeberle.com ailəsi olaraq Sumqayıtda gənc nəslin və idmanını inkişafına daim səylə çalışan M.Həsənovu fəxri ad alması münasibəti ilə təbrik edirik.

Xeberle.com