Sumqayıtda bina sakinləri Sumqayıt şəhər Qaz İstismar İdarəsindən şikayət edirlər. Onların sözlərinə görə, Sumqayıt şəhər Qaz İstismar İdarəsinin işçiləri onları aldadıb və hazırda qışın oğlan çağında qazsız qalıblar. Xeberle.com-a məlumat verən sakinlərin sözlərinə görə, dünən 13-cü mikrorayonun 39-cu binasına yeni smart tipli qaz sayğacları quraşdırılıb. Sayğacları quraşdıran əməkdaşlar sakinləri əmin ediblər ki, arxayın olun, bu 2 gün qazınız olacaq, kartın içində 2 günlük balans var, 3-cü gün isə özünüz gedib balansı doldurarsınız. Amma dünən gecədən bütün sakinlərin qazı kəsilib. Hətta elə mənzillər olub ki axşamdan bitib. Vətəndaşlar qalıblar qazsız. "Axı bizi niyə aldadırlar, kartın içində balans az ola ola deyirlər 2 gün bəs edəcək. Bunun bir ölçüsü, meyarı olmalıdır. Deməlidirlər də neçə kubmetr var. Evdə uşaq var, qoca var. Yemək bişirə bilmirik, bu soyuqda çay içə bilmirik.
Digər blokun sakini isə deyir ki, bu smart tipli sayğacı ötən həftənin cümə günü gəlib quraşdırdılar. Amma demədilər istifadəsi necə olmalıdır: necə doldurulmalıdır, kredit necə götürmək olar və sair. Üstündən 2 saat keçməmiş kartın balansı bitdi, qaz kəsildi. Bilmədik nə edək. Axırda qonşuya xahiş etmişəm gəlib düzəldib, kredit götürüb və izah edib ki, gedib idarədə qeydiyyata düşmək lazımdır. Oğlumu işdən tez-tələsik çağırmışam gedib qeydiyyata düşüb kart almaq üçün. Kartı isə dərhal hazır etmirlər. Sabahı da şənbə bazar gününə düşdü deyə, dedilər idarə işləmir, 1-ci gün gəlib götürün. Bu nə düməkdir?! Bəyəm mən 2 gün evdə qazsız oturmalıyam?! Axı bunu quraşdıran şəxslər nəzərə almalıdırlar, planlaşdırmalıdırlar, vətəndaşları nəzərə almalıdırlar.
Məsələ ilə bağlı Sumqayıt şəhər Qaz İstismar İdarəsinin baş mühəndisi Teymur Vəliyevdən bu deyilənlərlə bağlı açıqlama aldıq. Baş mühəndis söylədi ki, belə şey ola bilməz. Bizim işçilər istirahət günlərinə bir gün qalmış yeni sayğacları quraşdırmırlar, çünki sabahı gəlib insanlar qeydiyyata düşə bilmir və balansı doldura bilmirlər. Yeni sayğacın balansında isə 10 kub qaz olur və bu, mümkün deyil ki, 2-3 saata bitsin. Ola bilsin ki, koda düşüb. Amma mən yenə də sabah işçilərdən dəqiqləşdirəcəm və xəbər deyəcəm”.
T.Vəliyevin dedikləri ilə sakinlərin dedikləri üst-üstə düşmədi. Bu gün istirahət günü olduğundan məsələni dərindən araşdıra bilmədik, sabah problema yenidən qayıdacağıq.