Tofiq Cəfərov 35 min voltluq elektrik xətlərinin yerinin dəyişdirilməsini tələb edir

«Azərenerji»nin nümayəndəsi isə «mühafizə zolağında ev tikmək olmaz» deyir

Dekabrın 25-də Bizimyol.info-nun elektron poçtuna 65 yaşlı Tofiq Cəfərov tərəfindən şikayət məktubu daxil olub. Uzun müddət müəllim fəaliyyəti ilə məşğul olduğunu deyən T.Cəfərov həm də Qarabağ döyüşlərinin fəal iştirakçısı, ikinci qrup əlildir. O, "Azərenerji" Açıq Səhmdar Cəmiyyətindən şikayətçidir.

T.Cəfərov deyir ki, onların Sumqayıt şəhərində Novxanı bağları Qurd dərəsi adlanan ərazidə həyat yoldaşı Dilşad Cəfərovaya aid bağ evləri var. Ancaq evlərinin üzərindən keçən elektrik xətləri onun ailə üzvlərinin həyatı üçün təhlükə törədir: "Neçə illərdir ki, əziyyətlə işləyib pul yığıb ev tikmişəm. Bu bağ evinin üzərindən keçən yüksək gərginlikli elektrik xətləri uşaqlarımın, nəvələrimin həyatına təklükə törədir. Nə az nə çox, düz 35 min voltluq elektrik xətləridir. Bu vəziyyət məni də, həyat yoldaşımı da qorxudur. Çünki uşaqlar bu xəttin altında oynayırlar və hər gün qırılma təhlükəsi var. Bu xətlərin bağdan 4-5 metr aralı çəkilməsi üçün "Azerenerji" ASC-nin prezidenti Etibar Pirverdiyev cənablarına ərizə ilə müraciət etmişdim. Xəttin dəyişdirilməsinin öz vəsaitim hesabına başa gəlməsini üzərimə götürmüşəm".

T.Cəfərov deyir ki, "Azərenerji" ASC-nin rəhbərliyinin tapşırığı əsasında Sumqayıt şəhər enerji idarəsi əraziyə baxış keçirib. Qeyd edilib ki, elektrik xətlərinin 5-6 metr kənara çəkilməsi mümkündür: "Dedilər ki, "Azərenerji" ASC-nin rəhbərliyinin müvafiq razılığı əsasında bu xətti kənara çəkəcəklər. Ancaq uzun müddət keçməsinə baxmayaraq heç bir nəticəsi olmadı. Bununla bağlı "Azərenerji"nin baş idarəsinə zəng vurdum. Oradan bildirdilər ki, idarəyə göndərilən məktub düzgün yazılmayıb. Dərhal "Azərenerji"nin Sumqayıt bölməsinə müraciət etdim. Onlar məktubu yenidən dəyişdilər. Ancaq yenə də bir nəticə əldə edə bilmədim. Yenidən baş idarə ilə əlaqə saxladım. Mənə dolğun və düzgün cavab verən olmadı. Əgər bu iş mümkün deyildisə, niyə razılıq verirdilər? İndi mənə bildirirlər ki, elektrik xətlərinin kənara çəkilməsi mümkün deyil. Bu xətt həmin ərazidə olan bir neçə imkanlı şəxsin bağından çıxarılıb. Bəs mənim bağımdan niyə çıxarılmır? Məktublara baxmırlar. Bununla 3-cü dəfədir ki, məktubu dəyişdiriblər. Elə hey məni get-gələ salırlar. Yaxşı, bəs biz dərdimizi kimə deyək, kimə müraciət edək?"

"Azərenerji" ASC mətbuat xidməti rəhbərinin müavini Ələkbər Baxşəliyev "Bizim Yol"a açıqlamasında bildirdi ki, şikayətçi məsələylə bağlı qaynar xəttə müraciət etməli idi: "Bütün mətbuat yüksək gərginlikli elektrik xətlərinin mühafizə zolağından yazır. Şikayət edən şəxs əgər evini mühafizə zolağında tikibsə, "Azərenerji" nə üçün xətləri oradan çıxarmalıdır? Həmin xətləri çıxarmaq üçün Nazirlər Kabineti həmin işə baxmalıdır. Şikayətçi evini niyə mühafizə zolağında tikirdi? Mühafizə zolağında ev tikmək olmaz".

Xeberle.com