Bir neçə saat əvvəl portalımızda Sumqayıtda yüksək səsyayıcı qabiliyyətə malik partlayıcı oyuncaqların satışının qadağan edilməsinə baxmayaraq, şəhərin bir çox yerlərində açıq şəkildə satılmasından, səhərlərini partlayış səsləri ilə açan Sumqayıt sakinlərinin bunun qarşısında çarəsiz qalmasından bəhs edən material təqdim etmişdik. Polislərin gözü qarşısında oyuncaqların satıldığını və nəzarətin nəyə görə ciddi aparılmadığını aydınlaşdırmaq üçün isə Daxili İşlər Nazirliyinin mətbuat xidmətinin şöbə rəisi Orxan Mansurzadəyə müraciət etmişdik.
O.Mansurzadə Xeberle.com-a bildirmişdi ki, DİN Baş ictimai Təhlükəsizlik idarəsi hər yerdə yoxlamalar aparıb, satışı aşkar edilən yerlərdə oyuncaqların müsadirə edilməsi ilə yanaşı, satıcılar da cəzalandırılıb. DİN mətbuat xidmətinin şöbə rəsinin nəzərinə "Sumqayıt şəhərində belə yoxlamalar aparılsa da, bir çox yerlərdə partlayıcı oyuncaqlar açıq şəkildə satılır” iddiasını çatdırdıqdan sonra O.Mansurzadə məsələ ilə bağlı, Sumqayıt şəhər polis idarəsinə müraciət edəcəyini və məsələni araşdırıb müfəssəl məlumat verəcəyini bildirdi.
Amma şöbə rəisinin məlumatına ehtiyac qalmadı. Əldə etdiyimiz xəbərə görə, artıq Sumqayıt şəhərinin mərəkəzi bazarı və bir çox yerlərində şəhər polis idarəsinin əməkdaşları tərəfindən reydlər keçirilib. Satışı qadağan edilən bütün partlayıcı oyuncaqlar müsadirə edilərək satışdan çıxarılıb. Hətta polis əməkdaşları və satıcılar arasında ciddi mübahisələrin yarandığı da söylənilib.

Aytən Əli
Xeberle.com
P.S. Sumqayıt polisinə portalımız adından çox sağ ol deyirik! Yeri gəlmişkən, bayramlarını da təbrik edirik. Sözlərimizdən inciməsinlər, amma bu saatdan sonra satışdan partlayıcı oyuncaqların yığışdırılmasının ciddi əhəmiyyətinin olacağını zənn etmirik. Necə deyərlər, "Dəmiri isti-isti döyərlər.” Artıq satan satıb, alan da çoxdan alıb. Bir oyuncaq qutusunun içərisində 40-60 sayda partlayıcı oyuncaq var. İndi yarı zarafat, yarı ciddi, bir tövsiyəmiz var, polis əməkdaşlarımız eyni vaxtda Sumqayıtın müxtəlif yerlərində neçə uşağın neçə belə oyuncaq partlada bilməsi misalının cavabını tapmağa çalışsın.