Artıq bu ilin bitməsinə sayılı günlər qalıb. Yeni
il ərəfəsində sumqayıtlıları, xüsusilə də valideynləri ən çox maraqlandıran
suallardan biri də yeni il ilə əlaqədar şənliklərin harada keçiriləcəyidir.
Xeberle.com olaraq bununla bağlı məlumat əldə etmək üçün, Sumqayıt şəhər Mədəniyyət və
Turizm Regional İdarəsinin rəisi Mehman Şükürov ilə əlaqə saxladıq.
M.Şükürov bildirdi ki, yeni il
tədbirlərinin şəhərin müxtəlif yerlərində, insanların sıx toplaşdığı ərazilərdə
keçirilməsi planlaşdırılır: " Bu il yeni illə bağlı tədbirlərin Sumqayıt Dövlət
Dram Teatrında, Nəriman Nərimanov adına Mədəniyyət Mərkəzində, Nizami
kinoteatrında (keçmiş "Rosiyya” klubu) keçirilməsi nəzərdə tutulub. Bundan
başqa Əlillər Cəmiyyəti də xüsusi yeni il tədbiri keçirəcək”.
Bayram ərəfəsində həmçinin şəhərin
müxtəlif yerlərində şam ağacları quraşdırılıb. Şəhərin Bulvar ərazisində quraşdırılan şam ağacının hündürlüyü isə 14
metr hündürlüyündədir.
Qeyd edək ki, yeni il ilə
bağlı ümumşəhər tədbirinin dekabr ayının 29-da keçirilməsi nəzərdə tutulub.
Elnarə Salamova
Xeberle.com
Xəbərdən istifadə edərkən istinad etmək vacibdir.
