Hər bir cəmiyyət üçün ən böyük fəxr onun savadlı gənclərinin olmasıdır. Xeberle.com-un budəfəki müsahibi belə gənclərimizdən biri olan Cahan Haşımzadədir. C.Haşımzadə 2018-2019-cu tədris ili üçün ali təhsil müəssisələrinin II və III qrup üzrə bakalavriat pilləsinə qəbul imtahanlarından ən yüksək nəticə əldə edən abituriyentdir. O, II ixtisas qrupu üzrə imtahan verib və adını 700 bal toplayanlar sırasına yazdırıb.
HAŞİYƏ: Haşımzadə Cahan Vüqar qızı 19 oktyabr 2001-ci ildə Şəki şəhərində anadan olub. 2007-2011-ci illərdə Sumqayıt şəhər 23 saylı tam ota məktəbdə, 2011-2018-ci illərdə isə Sumqayıt şəhər Təbiət Elmləri Təmayüllü Gimnaziyada təhsil alıb. Orta məktəbi əla qiymətlərlə bitirən Cahan oxuduğu müddət ərzində heç vaxt aşağı nəticə göstərməyib.
- Bu nəticəni gözləyirdinizmi? Ümumiyyətlə imtahan zamanı həyəcan vardımı?
- 700 bal yığa biləcəyimi özüm də, başqaları da təsdiq edirdi. İmtahan zamanı təbii ki, hər bir abituriyent kimi məndə də həyəcan vardı. Əsas məsələ də o həyəcanı imtahan zamanı yox edə bilmək idi.
- Bir az ailəniz barədə danışaq... Böyük ehtimal bu uğurlu nəticənin əldə olunmasında onların da payı böyükdür...
- Bu uğuru qazanmağımda valideynlərimin rolu çox böyükdür. Mənə hər zaman dəstək oldular, heç vaxt inamlarını itirmədilər, mənə güvəndilər. Müəllimlərimin rolu isə ən əsasıdır. Həm məktəb müəllimlərimin, həm də repetitorların köməyi ilə bu nəticəyə nail olmuşam. Onlar (müəllimlərim: Şamil, Mayıl, Azər, Güllü, Humay) məni ideal səviyyədə hazırlaşdırıblar. Mən də ideal səviyyədə onların tapşırıqlarını yerinə yetirməyə çalışmışam.
- İmtahanda ən yüksək nəticəni əldə etmisiniz. Bu uğurun sirri nədir? Yüksək nəticə əldə etmək istəyən abituriyentlərə nə məsləhət görürsünüz?
- Uğurun sirri zəhmət çəkməkdən keçir. Heç kəsin əziyyəti boşuna getmir, əlindən gələn qədər çalışmısansa, mutləq nəticə əldə edirsən. Ona görə də insan qarşısına məqsəd qoymalıdır.
- Niyə məhz II ixtisas qrupu? Hansı ixtisası və universiteti seçməyi düşünürsünüz?
- Uşaqlıqdan tarix və coğrafiyaya marağım böyük idi. II ixtisas qrupunu seçməyimin əsas səbəbi budur. Azərbayca Diplomatik Akademiyası (ADA) və ya Azərbaycan Dövlət İqtisad Universitetinin (UNEC) maliyyə (ingilis dilində) fakültəsinə sənəd verməyi düşünürəm.
- Sizcə, 700 ballıq nəticə əldə etmək üçün yalnız savad lazımdır, yoxsa burada şansın da rolu var?
- Bu balı toplamaq üçün savad zəruridir. Şans məsələsinə gəldikdə isə, hesab edirəm ki, imtahan suallarını işləyərkən maksimum dərəcədə diqqətli olmaq, özünü itirməmək, biliyi harada və necə işlətməli oldugunu bilmək lazımdır. Bir şagird bu xüsusiyyətlərə malikdirsə, bu, elə onun nə qədər şanslı olduğuna əsl nümunədir.
Elnarə Salamova
Xeberle.com
P.S. Sonda Cahan Haşımzadə bütün abituriyentlərə canlı müraciət ünvanlayıb.
Xəbərdən istifadə edərkən istinad etmək vacibdir.
