Sumqayıtda fəaliyyət göstərən iri ticarət, market şəbəkələrinin əksəriyyətində avtomobil dayanacaqlarının olmaması yollarda tıxac, eləcə də şəbəkələrin yerləşdiyi ərazilərdə yaşayan bina sakinləri üçün müəyyən problemlər yaradır.
Şəhərin 17-ci mikrorayonunda fəaliyyət göstərən "Səda” ticarət mərkəzinin yaxınlığında yaşayan sakinlər də bu kimi problemlərlə hər gün rastlaşır. Sakinlərdən birinin Xeberle.com-a verdiyi məlumata görə bu hal demək olar ki, hər gün yaşanır. Belə ki, ticarət mərkəzindən alış-veriş etmək istəyən müştərilər avtomobillərini yolun hərəkət hissəsində saxlayır və bu da ərazidə tıxacın yaranması ilə nəticələnir. Üstəlik, bəzi müştərilər nəqliyyat vasitələrini ticarət mərkəzinin arxa hissəsində yerləşən yaşayış binalarına gedən avtomobil yolunda saxlayırlar. Bu da bina sakinlərinin haqlı narazılığına səbəb olur. Şikayətçi bildirir ki, nəqliyyat vasitəsinə sahib olan bina sakinləri bu yoldan keçərək mənzil başına normal şəkildə gedə bilmirlər. Nəticədə market əməkdaşları, ərazidə avtomobil saxlayan müştərilərlə sakinlər arasında mübahisə yaranır. Üstəlik, bu gün bayram olduğunu nəzərə alsaq, ərazidə olan vəziyyəti təsəvvür etmək o qədər çətin deyil.

Bu gün də həmin ərazidə sakinlər və ticarət mərkəzinin müştəriləri arasında mübahisə yaranıb. İş o yerə çatıb ki, sakinlərlə müştərilər əlbəyaxa olublar. Sonradan tərəflər arasında yaranan mübahisəni sakitləşdirmək mümkün olub. Bina sakinləri ticarət mərkəzinin rəhbərliyi ilə görüşüb və tez bir zamanda yaranan vəziyyətin aradan qaldırılmasını tələb ediblər. Ticarət mərkəzinin rəhbərliyi sabah problemin həll edilməsi istiqamətində addım atacaqlarını bildirib.

Ümidvarıq ki, sözügedən problem tezliklə aradan qaldırılacaq. Qarşı tərəfin də mövqeyini işıqlandırmağa hazırıq.

Xeberle.com