"Bir dəfə də bu məsələyə görə biz Sumqayıt Şəhər Təmizlik Departamentini və onun rəhbəri Rahim Mustafayevi cəzalandırmışıq"

Bu sözləri Ekologiya və Təbii Sərvətlər Nazirliyinin sektor müdiri Raqub Mirzəyev Sumqayıtın çıxışında yerləşən bərk tullantıların zərərsizləşdirilməsi üçün nəzərdə tutulan zibillik poliqonunda baş verən qanunsuzluqlarla bağlı açıqlama verərkən deyib. Sektor müdiri onu da qeyd edib ki, bu cür hallar daha əvvəllər də qeydə alınıb, lakin nazirliyin məsələyə qarışmasından sonra öz həllini tapıb:

"Əvvəla onu qeyd edim ki, adıçəkilən poliqon Sumqayıt şəhər məişət poliqonu kimi istifadəyə verilib. Amma həmin poliqona hansısa şirkət və yaxud istehsalçı firma tərəfindən tullantılar atılırsa, bu, qanun pozuntusudur. Ümumiyyətlə, həmin ərazi Sumqayıt şəhər İcra Hakimiyyətinin balansındadır. Ərazinin tullantılar üçün ayırdığı yerin həcmi 35-40 hektardan ibarətdir. Həmin əraziyə cavabdeh qurum isə Sumqayıt şəhər Təmizlik Departamentidir.

Adıçəkilən departamentin işi isə əraziyə gələn tullantıları basdırmaq, zərərsizləşdirməkdən ibarətdir. Amma tullantıların yandırılması qanuna ziddir. Nəzərinizə onu da çatdırım ki, bu cür qanunsuzluğa yol verdiyi üçün, Sumqayıt Şəhər Təmizlik Departamentinin rəhbəri Rahim Mustafayev tərəfimizdən 6500 manat civarında cərimələnb və bir daha bu cür işlərin bir daha görülməməsi üçün tapşırıqlar verilib. Sizin vasitənizlə bildirmək istəyirəm ki, bu yaxınlarda baş verən qanunsuzluq bir daha tərəfimizdən araşdırılır və yoxlamalardan sonra qanunsuzluq sübut edilərsə, həmin departament yenidən qanunla cəzalandırılacaq".

Onu da qeyd edək ki, Sumqayıt Şəhər Təmizlik Departamentinin rəhbəri Rahim Mustafayevin özü isə açıqlama verərkən bildirb ki, yaxın zamanlarda sözügedən problemi həll etməyə çalışacaqlar. 

P.S. Ümid edirik ki, problemlə bağlı adiyyəti orqanlar da lazımi addımlar atacaq və Sumqayıt şəhər sakinləri təmiz hava almaq haqqından faydalana biləcəklər. (xeberlent.az)