"Sumqayıtı tanımayan, tarixini, şəhəri qurub yaradanların həyat yolunu bilməyən kəslər bu şəhərə tələb olunan töhvəni verə bilməzlər”

"Bu mövzu Sumqayıt üçün həmişə aktual olub və bu bu gün də aktualdır. Mən özüm ixtisasca kimyaçı mühəndis-texnoloqam və və əmək fəaliyyətimə 1966-cı ildən başlayıb uzun müddət kimya sənayesində müxtəlif vəzifələrdə çalışdığımdan bu məsələ ilə yaxından tanışam.”

Bu sözləri Xeberle.com-a açıqlamasında uzun müddət Sumqayıtda məsul vəzifələrdə işləyən Süleyman Hüseynov deyib. Məhz Sumqayıt şəhərində ən zəhərli kimya məhsullarının istehsalı müəssisələrinin yaradılmasının (civə üsulu ilə xlor və kaustik soda, ftorlu alüminium, amin duzu, lindan və s.) millətimizə qarşı yönəldilən genosid siyasətinin tərkib hissəsi olduğunu vurğulayan S.Hüseynov 80-ci illərdə SSRİ Kimya Sənayesinə rəhbərlik edən ermənilərin dövründə də bu siyasətin israrla yeridildiyini qeyd edib: "O vaxt nazir Konstantov və onun müavini Muradovun (hər ikisi erməni idi) təşəbbüsü və təkidilə Sumqayıtda dəhşətli xəstəliklər mənbəyi olan "Lindan” istehsalatı tikilib istifadəyə verildi. Fəhlələri ora zorla işə göndərirdilər. Başqa sexlərdə işləyənləri məcburən ora keçirirdilər, razı olmayanları işdən azad edirdilər. Şirnikləndirici şərtlərə baxmayaraq, insanlar orda işləmək istəmirdilər. Bu istehsalat Sov.İKP-nin nəzarətində olduğundan bizə böyük təzyiqlər vardı. İstehsalatı kadrla göstərilən qrafiklə təmin etmədiyimə görə mənə töhmət də verildi (o zaman mən "KİMYASƏNAYE” İB-nin baş direktorunun kadrlar üzrə müavini işləyirdim). Lakin yaxşı ki, bu istehsalatı dayandırmağa məcbur oldular.”

Kimyaçı-texnoloqun sözlərinə görə, o fəsadlar bu gün də özünü göstərir. Respublika rəhbərliyinin uğurlu siyasəti nəticəsində köhnə texnologiya ilə işləyən, zəhərli istehsalatlar bağlandı, söküldü və indi onların yerində yeni, müasir texnologiyaya malik istehsalat sahələri tikilir. Bu,çox yaxşıdır. Lakin burda bir məsələ nəzərə alınmayıb: "SAM zavodu (keçmiş Kimya zavodu - "KİMYASƏNAYE” İB) ərazisi uzun illər zəhərli maddələrlə, xüsusən də civə ilə zəhərlənib. Civə bildiyiniz ki, həll olunmur, neytrallaşmır. Və belə bir ərazidə müvafiq xüsusi təhlükəsizlik tədbirləri görülmədən yeni sahələrin inşaası risklə bağlıdır, fəsad verməsi istisna deyil. Bu məsələ əlaqədar təşkilatların diqqətini cəlb etməlidir.”

S.Hüseynov XXI əsr olmasına baxmayaraq, məişətdə hələ də ötən əsrin neqativ halları yaşanmaqda olduğuna diqqət çəkib: "Belə ki, zirzəmilərin çirkab suları, həyətyanı sahələrin çoxunda kanalizasiya sisteminin yoxluğu, məişət tullantılaraının vaxtında daşınmaması, emal olunmaması həqiqətən ekologiyanın korlanması səbəblərindəndirlər.”

Kimyaçı-texnoloq vurğulayıb ki, illər boyu Sumqayıt respublika kadrları üçün tramplin rolunu oynayıb və bu gün də oynamaqdadır: "Sumqayıtı tanımayan, tarixini, şəhəri qurub yaradanların həyat yolunu bilməyən kəslər bu şəhərə tələb olunan töhvəni verə bilməzlər. Onlar müqavilə yolu ilə işləyən kadrlardır. Müqavilə müddəti bitəndən sonra özgə regiona, yaxud böyüyüb başa çatdıqları, yaşadıqları məkana dönəcəklərini yaxşı bilirlər. Biz sumqayıtlılar isə həmişə öz problemlərimizlə qalırıq, yeni ümidlə yaşayırıq...”

Xeberle.com