Qanun hamı üçün qanundur, o cümlədən yol hərəkəti haqqında qanunlar da. Təəssüf ki, Sumqayıtda bu qaydaları kobud surətdə pozan fərdi və ictimai nəqliyyat sürücülərinə mütəmadi rast gəlirik. Amma acınacaqlı haldır ki, bəzən yol polislərimiz də onlardan geri qalmayıb yol hərəkəti qaydalarına məhəl qoymayaraq onları kobud şəkildə pozurlar.
Xeberle.com-un əməkdaşları sutkanın müxtəlif vaxtlarında – gecə və gündüz olmaqla 2 yol polisi avtomobilinin yol hərəkəti qaydalarını kobud sürətdə pozduğu anları görüntüləyə bilib.

Aşağıda - sutkanın gündüz vaxtı çəkilən fotolardan gördüyünüz kimi, 10 YP 600 dövlət nömrə nişanlı yol polisi avtomobilini idarə edən yol polislərimiz Heydər Əliyev prospekti ilə Sülh küçəsinin kəsişməsində, avtomobillərin hərəkət istiqamətini tutaraq onlara mane olan vəziyyətdə dayanıblar və üstəlik sürücülərlə aynalar arasından söhbətləşirlər. Onlarla 7-8 metr aralıdakı piyada keçidindən istifadə etməyərək yol hərəkət qaydalarını pozan piyadalar arasında heç bir fərq yoxdur. Sən demə bu, Sumqayıt DYP-sinin komandirinin avtomobili imiş.

Sutkanın gecə saatlarında çəkilən fotolardan isə görünür ki, 10 YP 962 dövlət nömrə nişanlı avtomobili idarə edən yol polisləri Heydər Əliyev parkının giriş hissəsinin yanında, Sərvər Bədəlbəyli küçəsi ilə Zülfü Hacıyev küçələrinin tam kəsişməsində - özü də işıqfor olan döngədə yolun hərəkət istiqamətini tutaraq dayanıblar və yenə də hansısa cərimə edəcəkləri sürücü ilə söhbətləşirlər. Sanki özlərindən o qədər əmindirlər ki, avtomobillərini heç yolun kənarına da çəkməyiblər.

Elnur Ağayev
Fotolar Kamran Kazımzadənindir

P.S. Bir neçə gün öncə Şərq bazarı ətrafında xidməti avtomobili Sumqayıt nömrəsi ilə olan bir yol polisimiz çox mədəni, səliqəli şəkildə dayanma, durma, parkinq qaydalarını pozan sürcülərin avtomobillərinin fotolarını çəkib onları cərimə edirdi. Bu davranış, bu hal çox xoşuma gəldiyindən, yaxınlaşıb ona xüsusi təşəkkürümü bildirəndə, həmin polis nəfərinin heyrətləndiyini hiss etdim.
Kim bilir, bəlkə də həyatında ilk dəfə olaraq hansısa vətəndaş ona etdiyi bu cür xidməti işlərə görə təşəkkür edirdi.