"Sumqayıtın məhəllə və mikrorayon yollarının əsaslı təmiri, yaxud yenidən qurulması üçün şəhər bələdiyyəsinin hər hansı bir proqramı yoxdur"

Son günlər Sumqayıt şəhər sakinləri tərəfindən Xeberle.com saytına davamlı olaraq yaşadqıları ərazidə yolların bərbad vəziyyətdə olması ilə bağlı şikayətlər daxil olur. Belə müraciətlər bir sıra xəbər saytlarında da öz əksini tapır. Sumqayıt sakinləri yaşadıqları ərazidə yolların zığ-palçıq içərisində olmasından gileylidirlər. Bir çox məhəllə və mikrorayonların məhəllədaxili yolları uzun zamandır ki, təmir edilmir. Asfalt örtüyü dağılıb. Yağış yağanda yollarda əmələ gələn gölməçələr günlərlə qurumur. Palçıqlı yoldan uşaqlar da, böyüklər də hər dəfə keçib gedəndə əziyyət çəkirlər. Şəhər yerində palçıqlı ayaqqabılarla dolaşmaqdan xəcalət çəkən sakinlər yolların təmirinə cavabdeh olan təşkilatlara deyil, KİV-ə üz tuturlar. 18-ci mikrorayon 30, 31, 33 saylı binaların qarşısındakı yollar, 51-ci məhəllədə yerləşən məktəbin qarsışındakı yollar, 9-cu mikrorayonun və 34-cü məhəllənin keçilməz və əzablı yollarından, 33 saylı marşrutun yolunda kifayət qədər xəbər saytlarında bəhs edilib və problem lazımi şəkildə işıqlandırılıb. Qeyd edilən məhəllə və mikrorayonlardan əlavə şəhərin demək olar ki, bir çox yerlərində məhəllədaxili yolların təmir edilməsinə ehtiyac var. Məhəllədaxili yolların təmiri və yenidən quraşdırılması artıq şəhər bələdiyyəsinə həvalə edilib. Küçələrin palçıqlı və təmirsiz olmasına yerli idarəetmə orqanı məsuliyyət daşıyır. Suallar yaranır.... Yeni ildən etibarən Sumqayıt şəhər Bələdiyyəsi məhəllədaxili yolların təmiri ilə bağlı nə kimi işlər görməyi planlaşdırır? Təmirə ilk olaraq hansı mikrorayon və məhəllədən başlanılacaq?
Yeni formalaşan Sumqayıt şəhər Bələdiyyəsinin sədr müavini Sultan Əsədovun suallarımıza cavabı konkret oldu. Son illər Sumqayıt şəhər Bələdiyyəsi tərəfindən "Yaşıl Dərə” yaşayış massivi və bağlar yollarının təmiri ilə bağlı bir sıra işlər görülüb. Sumqayıtın məhəllə və mikrorayon yollarının əsaslı təmiri və yaxud da, yenidən qurulması üçün şəhər bələdiyyəsinin hər hansı bir proqramı yoxdur. Çünki, yolların təmiri üçün tələb olunan vəsait də yoxdur. Sumqayıt kiçik şəhərdir. Şəhər bələdiyyəsinin də büdcəsinə daxil olan vəsait sahibkarlardan alınan torpaq vergisidir. Bu vəsaitlə yolları təmir etmək mümkün deyil. Bəli, gördüyünüz kimi, şəhərin məhəllədaxili yollarının təmiri üçün bələdiyyənin büdcəsində tələb olunan vəsait yoxdur.
Əsas sual? Belədirsə, bəs məhəllədaxili yolları kim təmir etməlidir? 
Deyəsən elə problemin həlli sakinlərin öhdəsinə düşür. Sakinlər ya öz hesablarına yaşadıqları həyətin yollarını təmir etməli, ya da palçıqlı yollardan keçib-getməyə alışmalıdırlar.

Aytən Əli
Xeberle.com