Son zamanlar Bakı-Sumqayıt marşrutlarının 20 yanvara köçürülməsi ilə bağlı sürücülərin əlinə əməlli-başlı fürsət düşüb. Üzr istəyirəm ifadəmə görə, necə deyərlər, "Atlar ölüb, itlərin bayramıdır". Rəsmi tariflərə görə marşrutlarda gedişhaqqı 35 qəpik olduğu halda, onsuz da elə "əzəldən" 40 qəpikdən yığılırdı. Hələ bu, azmış kimi son günlər insanların çarəsizliyindən sui-istifadə edərək gedişhaqqını 40 qəpikdən 60 qəpiyə kimi qaldırıblar. Axşam saatlarında "Bakı avtovağzalında" bir marşrut avtobusu belə tapmaq olmur. Çox maraqlıdır, hansı səbəbə görə "sürücü əmilər" bu cür özbaşınalığa yol verirlər?! Bu qaydanı pozan sürücülər nə vaxt əməlli-başlı "qulaqburması" - müvafiq tutarlı cəza alacaqlar?
Bildiyimiz kimi, Bakı-Sumqayıt marşrutundan ən çox istifadə edən tələbələrdir. Bunlardan da yarısından çoxu gənc qızlardır. Görəsən, həmin gənc qızlar arasında bu sürücülərin qızları, qohumları varmı? Bir sual ortaya çıxır... Yoxsa "torbada pişik var"? Bəlkə aidiyyəti qurumlar "torbadakı pişiyi" görmürlər?
Bu dəm görkəmli sənətkarımız rəhmətlik Nəsibə xanımın bir sözu yadıma düşdü. Bilmirəm cinmi mənim başıma vurdu, yoxsa mənmi cinin başına vurdum, ağlıma belə bir fikir gəldi ki, buna son qoymağın bir yolu var. "Sürücü əmilər" əziyyət çəkib pul yığmasınlar. Gediş-gəliş ödəmələri sivil qaydada, sivil dövlətlərdə olduğu kimi bilet satışıyla həyata keçirilsin. Onda nə şiş yanar,nə kabab. Onsuz da marşrutlarımızda kartla ödəniş sistemindən konkret bir xəbər-ətər yoxdur...
Zeynəb Abdullah
Xeberle.com