- Sənətə 1998-ci ildə gəlmişəm. Universiteti bitirib, hərbi xidmətə getmişəm. 1999-cu ildə isə Sumqayıt Dövlət Dram Teatrına işə başlamışam. O vaxtdan aktyor kimi fəaliyyət göstərirəm. 

- İlk böyük rolum 1998-cu ildə kurs işim olub və Akademik Milli Teatrında reallaşıb. İlk baş rolum isə diplom tamaşam olub. Viktor Rozovun "Şadlıq sorağında" tamaşasında Oleq rolunu ifa etmişəm. Vaxtilə müxtəlif rollar oynamışam, indi müəyyən səbəblərdən fəaliyyətimi saxlamışam. Amma mənim də uğurlu dövrüm var idi.

- "Uğurlu dövrüm deyəndə”, - bu ifadə mənə yad gəlir. Desəm ki, uğurlu dövrüm hansısa illərdə olub, bu o deməkdir ki, mən indi uğursuzluq yaşayıram, fəaliyyətimi dayandırmışam. Mən buna uğurlu dövr yox, uğurlu anlar deyərdim. Təbii ki, uğurlu anlarım olub, şükürlər olsun ki, indi də davam edir. Çünki, bir aktyor kimi hazırda bir neçə teatrda fəaliyyət göstərirəm. Təkcə Sumqayıt Dövlət Dram Teatrında yox, həm də Yuğ və M teatrlarında yeni tamaşalar oynayıram. Hər dəfə də bu tamaşaların uğurunu izləmək mənim uğurlu anlarımı artırır.

- Yenə də mən ilk oynadığım tamaşada -  Akademik Milli Dram Teatrında "Şadlıq Sorağında" tamaşasındakı tərəf müqabillərimdən rəhmətliklərin adını çəkə bilərəm.  Sofa Bəsirzadə "ana” rolunu oynayırdı. Allah rəhmət eləsin. Sevil Xəlilova, Elxan Ağahüseynoğlu da tərəf müqabillərim olub. İllər sonra Akademik Milli Dram Teatrında "Napaleon" tamaşasında Napaleon rolunu oynamışam. Orda mənim tərəf müqabilim xalq artistləri Zemfira Nərimanbəyova və Sabir Məmmədov idi. Yuğ teatrında tərəf müqabilim xalq artistləri Məmmədsəfa müəllim və Vidadi Səfərov olub. Sumqayıt Dövlət Dram Teatrında da çox istedadlı aktyorlar tərəf müqabillərim olub. Azərpaşa Nemətov və Zəfər teatrında Fuad Poladov kimi böyük sənətkarlar da tərəf müqabillərim olub. Müqavilə ilə Azdramada 3-4 tamaşa təhvil vermişəm. Sumqayıt Dövlət Dram Teatrı, Yuğ Dövlət Teatrı, Zəfər Teatrı, M Teatrı, İrəvan Teatrı...Bu teatrların hamısında müəyyən bir dövrdə müqavilə ilə çalışmışam. Bu baxımdan tərəf müqabillərim çox olub. Azərbaycan teatr aktyorlarının demək olar ki, yarısı mənim tərəf müqabilim olub. Sumqayıt teatrının bütün aktyorları ilə tərəf müqabili olmuşam.

- Xeyr pul qazanan aktyor olmamışam. Yəqin ki, teatrda maaşların nə vəziyyətdə olması ilə bağlı məlumatınız var. Aktyor tamaşlarda rol oynayır. Buna görə ona əlavə pul yazılmır. O, ancaq maaş alır. Bu baxımdan mən bir neçə teatrda fəaliyyət göstərirəm. Əgər, yüksək maaş, habelə hər oynadığım tamaşaya görə qonorar verilsəydi, Azərbaycanda ən çox qazanan aktyor olardım. Bizdə isə pul qazanmaq üçün məclislərə tamada kimi getmək lazımdır. Məhz sənətlə məşğul olursansa, puldan əlini üz...

- Seriallara dəvət edilmişəm. Amma hərdən ssenariyə, ya da pula görə çəkilmək istəməmişəm. 

- Bu gün hansısa serialı bəyənirəm desəm, yalan olar. Lakin fərqi görürəm. Hansısa rejissorun düşüncəsini və zövqünü görürəm. Amma, yaxşı rejissorlarımız var. Sadəcə olaraq, problemlər olduğuna görə həmin rejissorlar istədiyi serialı çəkə bilmirlər. Onlara hər bir şərait yaradılsa, istədiyi serialı ərsəyə gətirə bilərlər. Hərdən bizim seriallarla, Türkiyədə çəkilən serialları müqayisə edirlər. Bu düzgün deyil. Onların büdcəsi ilə bizim büdcəmiz arasında yerlə göy arasında fərq var. Bizdə bütün heyətin aldığı pulu, Türkiyədə bir aktyor alır. Təbii ki, bunu artıq müqayisə etmək düzgün deyil. Bizdə ssenarini 5-10 gün yazırlar. Amma onlarda bir ssenarini yazmaq üçün illərlə vaxt gedir. Ümumilikdə, büdcə problemimiz var. 

- Bəzən tamaşaçıların tələbinə uyğun oynayırıq. Biz də onların tələbinə uyğun məcbur göstərməyə çalışırıq. Məncə, günah bizim özümüzdədir. Uşağın qabağına nəyi qoyursansa, onu yeyir. Hətta uşağın qabağına başqa yemək qoysan, yenə də ac qalmamaq üçün həmin yeməyi yeyəcək. Biz də tamaşaçılara nəyi təqdim ediriksə, onlar da o cür formalaşır. Azərbaycanda yetərincə zövqü və düşüncəsi olan tamaşaçılar var. Sadəcə olaraq, onları yönləndirmək lazımdır. Bu da vaxt və güclü PR tələb edir. Düşünürəm ki, bunlar olarsa, bizim yetərincə yaxşı tamaşaçılarımız var. Sadəcə bizim tamaşaların təbliğatı zəif olur. 

- Bizdə bəzi kütlə var ki, hər şeyə həm gülür, həm də ağlayır. Ona görə də onları güldürmək də, ağlatmaq da asandır. Sadəcə onları düşündürmək çətindir. Problemin yarısı onlardadırsa, yarısı da bizdədir. 

- Aktyora yaxşı rejissorlar lazımdır. Lazım gələrsə, xaricdən də dəvət olunmalıdır. Aktyorlar da o tamaşalarla məşğul olsun. Festivallar təşkil olunsun və biz də gedək. Ən əsası da axşam tamaşalarının çox olmasını istəyərəm. Tamaşaçılar bol olarsa, teatr buna görə pul qazanacaq. Eyni zamanda, aktyorların maaşının yaxşı olmasını istəyərəm. Hər oynadığı tamaşaya görə, maaşının üstünə pul da yazılsın. Bunlar olsa, məni qane edər. Amma çox gözəldir ki, son aylarda Sumqayıt teatrında canlanma var. Teatra yeni direktor təyin edilib. İnanıram ki, Samir Şəfiyev sadaladıqlarımı yaxın illər ərzində edəcək. 

- Sağ olun!