Yubilyarın şərəfinə yüksək səviyyədə hazırlanan tədbirdə Sumqayıt Şəhər İcra Hakimiyyətinin, Qubadlı Rayon İcra Hakimiyyətinin rəsmi nümayəndələri, təhsil, səhiyyə, mədəniyyət və digər sahələrin əməkdaşları, incəsənət xadimləri, yazıçılar, şairlər, jurnalistlər, həmçinin altı mindən çox aforizmlər müəllifi, yazıçı-publisist, həkim, ictimai-xadim Hümbət Həsənoğlunun yaratdığı və rəhbərlik etdiyi məşhur Sumqayıt Dostlar Klubunun İdarə Heyətinin üzvləri və başqaları iştirak edirdi.

Əməkdar artist Cəlal Məmmədov tədbiri giriş sözü ilə açaraq təbrik üçün sözü gələn qonaqlara verdi. Sumqayıt Şəhər İcra Hakimiyyəti başçısının birinci müavini Teymur Səmədov tədbir iştirakçılarına yubilyarın mənalı həyat yolundan və çoxşaxəli yaradıcılığından bəhs etdi. O bildirdi ki, Ağalar İdrisoğlu ömrünun altmış ilini bədii yaradıcılığa, jurnalistikaya, əlli ilini peşəkar teatr sənətinə həsr edib. Ötən illərin on doqquz ili, doqquz il aktyor və on il teatrın bədii rəhbəri-direktoru kimi çalışmağı Sumqayıt şəhərində teatrın birinci intibah dövrünə təsadüf edir. Həmin illərdə Sumqayıt teatrı məhz Ağalar İdrisoğlunun rəhbərliyi, inkişaf səviyyəsinə görə respublikada birinci yerdə olub. Onun səhnədə yaratdığı 40-dan artıq rolu və quruluş verdiyi 140 tamaşası, dünya xalqlarının on pyesinin dilimizə tərcüməsi incəsənət və mədəniyyətə böyük töhfələridir. Ağalar müəllimin 150-dən artıq hekayəsi, altı romanı, on iki povesti, on beş pyesi, 1500-dən çox məqaləsi, publisist yazıları, esseləri, elegiyaları, 20-dən çox kitabı bu gün də oxucular tərəfindən maraqla oxunur.

Birinci müavin Teymur Səmədov son zamanlar Sumqayıt şəhərində sosial-mədəni sahədə müsbət dəyişikliklərin geniş vüsət aldığını, bu sahədə çalışan insanların işlərinin faydalı olduğunu bildirdi. Sumqayıt Şəhər İcra Hakimiyyətinin başçısı cənab Zakir Fərəcovun adından yubiliyarı təbrik edərək Sərəncamla bədii yaradıcılığının 60, peşəkar teatr fəaliyyətinin 50, anadan olmasının 75 illik yubileyi münasibətilə şəhərin ictimai-mədəni həyatında göstərdiyi fəaliyyətinə görə təltif edildiyi Fəxri fərmanı Ağalar İdrisoğluna təqdim etdi.

Qubadlı Rayon İcra Hakimiyyəti başçısının birinci müavini Allahverdi Haqverdiyev rayonun icra başçısı Malik İsaqovun təbrikini çatdırdı. Allahverdi Haqverdiyev bildirdi ki, hələ 1990-cı illərdə rəhbərlik etdiyi Sumqayıt Dövlət Musiqili-Dram Teatrının kollektivi ilə Qubadlı rayonunda tamaşalarla qonaq olan Ağalar İdrisoğlu ən ağır illərdə də incəsənətin və mədəniyyətin inkişaf tarixində yorulmadan çalışır, rayon camaatı və torpağın müdafiəsinə qalxan əsgərlərlə görüşlər keçirirdi. Həmin vaxtı onun rəhbərlik etdiyi teatr hər yerdə böyük coşqu ilə qarşılanırdı. Təbriklərə qoşulan Azərbaycan Yazıçılar Birliyinin Sumqayıt Bölməsinin sədri Gülnarə Cəmaləddin və Sumqayıt Dövlət Dram Teatrının baş rejissoru, Xalq artisti Firudin Məhərrəmov çıxışlarında qeyd etdilər ki. qəlbi həmişə teatra yeni töhfələr vermək istəyi ilə çırpınan Ağalar İdrisoğlu həqiqətən incəsənətə bağlı insandır.

Yubilyara Fəxri fərmanlar və çoxlu hədiyyələr təqdim olundu.

Ötən şirin xatirələrdən danışılaraq qeyd olundu ki, Milli səhnəmizin rejissor- yazıçısı Ağalar İdrisoğlu (Mehdiyev) dünyaya göz açdığı Masallı rayonunun və 26 yaşından taleyini bağladığı Sumqayıt şəhərinin ilk peşəkar dramaturqu, Moskva şəhərində Beynəlxaq Teatr Akademiyada təhsil alan ilk və yeganə peşəkar teatr rejissoru və yeganə Əməkdar İncəsənət Xadimidir. O, qırx səkkiz dramaturq arasında "İnan mənə” pyesi ilə üç laureatdan biri kimi təsdiq olunub. 1986-cı ildə Moskvanın "İskusstvo” nəşriyyatında işıq üzü görən "Məhəbbət və başqaları” adlı antologiyada bu pyes də dərc edilib. Ağalar İdrisoğlu SSRİ Dramaturgiyası Antologiyasında pyesi çap olunan yeganə azərbaycanlı sovetlər ittifaqının dramaturqlar laureatıdır.

Tanrıdan verilən istedad Ağalar İdrisoğlunun bütün həyatını al-əlvan rənglərlə boyayıb işıqlı yolun yolçusu etməklə cəmiyyətdə sevilən, seçilən, zəngin mənəviyyata malik əsl şəxsiyyət kimi tanıdıb. Xoş xatirələrlə dolu olan mənalı və düşündürücü ömrün 75 ilini geridə qoyan Ağalar İdrisoğlu haqqında bu gün yazılan esselər, şeirlər, bəstələr, məşhur yazıçıların, rejissorların, tənqidçilərin, tanınmış ictimai xadimlərin və digərlərinin onun haqqında dedikləri fikirlər maraqla qarşılanır.

Ağalar İdrisoğlu tədbirin təşkilatçılarına, iştirakçılara və onu təbrik edib ürək sözlərini çatdıranlara minnətdarlığını bildirdi. Yubilyar öz çıxışında baş rejissor, Prezident mükafatçısı, Xalq artisti Firudin Məhərrəmovun, direktor Samir Şəfiyevin böyük zəhməti sayəsində Sumqayıt Dövlət Dram Teatrının ikinci intibah dövrünü yaşadığını vurğuladı. İdeya müəlliflərindən biri olduğu Azərbaycan dahilərinin əksi olan foto kolajı yadigar olaraq teatra təqdim etdi. Son dövrdə çapdan çıxan sayca iyirminci kitabı, pyeslər toplusunun birinci cildi olan "Şah İsmayıl Xətai” kitabını və Azərbaycanda təhsilin yüksək səviyyədə inkişaf etdirilməsində böyük əhəmiyyətə malik ola biləcək "Müəllim qaranlığı yaran işıqdır” iyirmi birinci kitabını teatrın kitabxanasına hədiyyə verdi.

Möhtəşəm keçən tədbirin sonunda Ağalar İdrisoğlunun tərcüməsi əsasında hazırlanan, Xalq artisti Firudin Məhərrəmovun quruluş verdiyi tamaşaçı rəğbətini qazanan Georgi Xuqayevin "Varlı Ev” tamaşası ikinci dəfə teatrsevərlər tərəfindən maraqla izlənildi. Bu tamaşanın quruluşçu rəssamı Əməkdar rəssam Nabat Səmədova, icraçı rəssamlar - Nizami Dadaşov, Arif Müzəffərov, musiqi tərtibatçısı Şəmistan Muradxanlıdır. Həmin tamaşada rolları bu aktyorlar ifa etdilər. Beçir- Əməkdar artist Rauf Ağakişiyev, İrma - Əməkdar artist Elmira Kərimova, Sərmət - Oktay Mehdiyev, Saniyyət- Aynur Hümbətova, Həbi - Əməkdar artist İzaməddin Bağırov, Uari - Elay Xasıyev. Tamaşanın hər epizodu tamaşaçılar tərəfindən gurultulu alqışlarla qarşılanırdı. Bu da ondan xəbər verirdi ki, tamaşa tamaşaçıların xoşuna gəlir.

RƏNA TƏBƏSSÜM,

Azərbaycan Yazıçılar Birliyinin və

Azərbaycan Jurnalistlər Birliyinin üzvü,

yazıçı-publisist, Mahmud Kaşğari mükafatçısı