"Sumqayıt şəhəri hər bir sumqayıtlı kimi, əlbəttə ki, mənə də dogma və əzizdir. Amma hələ çox işlər görülməldir."

Rubrikamızın qonağı bir çox seriallardan və filmlərdən tanıdığımız istedadlı aktyor Elxan Rzadır.

Tanıtım: Elxan Rzayev 1979-cu ildə Sumqayıt şəhərində anadan olub. 1996-cı ildə Sumqayıt şəhər 23 nömrəli orta məktəbi bitirib. Həvəskar aktyor kimi ilk dəfə Sumqayıtda fəaliyyət göstərən "Cavid" teatrında səhnəyə çıxıb. 1996-cı ildə Azərbaycan Dövlət Mədəniyyət və İncəsənət Universitetinə daxil olub. Tələbəlik illərində Əbdürrəhim bəy Haqverdiyevin "Yeyərsən qaz ətini, görərsən ləzzətini", Nəcəf bəy Vəzirovun "Yağışdan çıxdıq, yağmura düşdük", Cəfər Cabbarlının "Solğun çiçəklər", Anton Çexovun "Təklif" əsərlərində Ələsgər, Əşrəf bəy, Rəhman və Stepan Stepanoviç rollarını ifa edib. Cəfər Cabbarlının "Solmaz yarpaq" ədəbi–musiqili kompozisiyasında Cəfər Cabbarlı obrazını məharətlə ifa edib.

Tələbə ikən Azərbaycan Milli Dram Teatrında çalışıb, kütləvi səhnələrdə aktyor kimi çıxış edib. Bu illər ərzində teatrın aparıcı artisti, baş rolların mahir ifaçısı kimi teatr ictimaiyyətinin diqqətini özünə çəkib. 2000-ci ildən Bakı Bələdiyyə Teatrının aktyorudur. Cəfər Cabbarlının "Dönüş"ündə Ötgün Zamanbəyli, Cəlil Məmmədquluzadənin "Ölülər"ində İsgəndər, Nazim Hikmətin "Damokl qılıncı"nda Abe, Nəriman Nərimanovun "Nadir şah"ında Rzaqulu obrazlarının ifaçısı kimi yüzlərlə tamaşaçının məhəbbətini qazanıb. Hüseyn Cavidin "İblis"ində Vasif, Arif, Sofoklun "Elektra"sında Arest rollarını oynayıb. İ.Kərimovun "Xəyanətin müsibəti"ndə İmam Hüseyn, Ə.Pəhləvaninin "İnsan və İblis"ində İblis, A.Babayevin "Oğul" tamaşasında II şəhid, A.Məmmədovun "Dəli Domrul"unda Dondar, R.İçərişəhərlinin "Vətənə igidlər gərəkdir" tamaşasında Rüstəm, Ə.Əliyevin "Unutqanlıq qorxunc bəladır"ında II kişi, A.Qurbaninin "Türk sancağı"nda Lütfəli bəy və repertuarında olan onlarca tamaşada baş rollarda çıxış edib.

- Hazırda çox sayda seriallar cəkilir.Əksəriyyətində də istedadsız aktyor və aktrisalara rast gəlirik .Belə insanları görəndə aktyor sənətini seçdiyinizə görə peşmançılıq hissi keçirtmirsiniz ki?

- Ümumiyyətlə seriallarda qeyri-peşə sahiblərini görəndə təəssüf hissi keçirirəm.Hərə öz işi ilə məşğul olmalıdır. Əgər seriallarda çəkilib aktyor olmaq belə asandırsa, onda Mədəniyyət və İncəsənət Universiteti nə üçün və kimə lazımdır? Onda o universitet qapadılsın və gələcəkdə aktyor olmaq istəyən gənclər də öz işlərini bilsinlər. Amma aktyor olmağıma görə peşmançılıq hissi verən amillər - bizdə bu sənətə dəyər verilməməsi, aktyorların həyat şəraitinin çətin olmasidır.

- Qardaşınız Togrul Rza söyləyib ki, mən qardaşıma paxıllıq edib aktyor sənətini seçdim. Hətta "Toy gecəsi"serialında onun sevdiyi xanımla evləndiyinizə görə sizi öldürdü. "Qağayı"serialında da sizə qarşi paxıllıq hissləri vardı. Nə istəyir Toğrul sizdən?

- Togrul özünəməxsus xarakteri, tipaji olan aktyordur. Bizim rollarımız da hər zaman fərqli olur. "Toy gecəsi"və "Qağayı" serialındakı obrazlarımızın da qarşı-qarşıya gəlməsi əlbəttə ki, ssenariyə görədir. O ki qaldı Toğrulun mənə paxıllıq etməsi, bu gözəldir,daha da inkişaf edəcək (gülür- zarafat etdiyini söyləyir)

- Müxtəlif obazlar yaratmısınız. Bəs indiyə qədər özünüzü oynadığınız obraz varmı?

-Uilyam Şekspirin bir fikri var "Həyat bir səhnədir.İnsanlar aktyor.Hərə öz rolunu oynayıb həyatdan gedir". Mən də Allahın mənə verdiyi həyat rolunu oynayıram. Amma obrazlarımda tam özümü oynamaq istəmərəm.

- Daha çox müsbət, yoxsa mənfi obrazları canlandırmaq istəyirsiz?

- Mən həm müsbət, həm də mənfi obrazları oynamaq istərdim.Əsas odur ki,oynadığım hər bir obrazı dəqiqliyi ilə və tam məsuliyyətimlə oynayım ki, sabah tamaşaçıdan utanmayım. Bir də psixoloji düşündürücü obrazları daha çox oynamaq istərdim.

- Teatrda da fəaliyyət göstərirsiniz. Daha çox səhnədə oynamaq sizə zövq verir , yoxsa kamera önündə?

- Ümumiyyətlə teatrda tamaşaçılar qarşısında oynamaq daha çətin və məsuliyyətlidir.Çünki səhv edə bilməzsən.Amma kinoda kamera önündə səhv etdikdə təkrar çəkilib həmin səhvi düzəldə bilərsən. Həmçinin, teatrın öz gözəlliyi, çəkiliş meydanında , kamera qarşısında olmağın başqa gozəlliyi var.Amma yenə də teatr ve teatr səhnəsi daha üstün, hətta deyərdim ki sehrlidir.

- Niyə gənclərin teatra olan marağı azdır? Bu nə vaxta kimi davam edəcək?

- Əgər bu gün telekanallarımızda mütəmadi olaraq Azərbaycanda fəaliyyət göstərən teatrların tamaşalarını nümayiş etdirsələr, onda gənclər təbii olaraq teatra gələcəklər və yüksək axın olacaq. Necə ki, bu gün kinotearlarda nümayiş olunan filmlərin anonsları, reklamları telekanallar vasitəsilə geniş şəkildə təqdim olunur. Hətta bu reklamlara sərnişin daşıyan nəqliyyatların üzərində də rast gəlmək olar. Bu baxımdan kinotearlara axın çoxalıb. Bu bir yandan sevindirici bir haldır.Çünki bir müddət Sovet quruluşu dağıldıqdan sonra tamaşaçıların kinoteatrlara marağı azaldı. Teatra qaldıqda isə məncə telekanallar bu işdə maddi maraq güdmədən, şəxsi təşəbbüsləri ilə və cəmiyyəti maarifləndirmək məqsədi ilə teatrlarda olan tamaşaları nümayiş etdirməlidirlər. Teatrların səhnələrində yeni oynanılacaq tamaşaların anonslarını təqdim etməlidirlər. Çox təəssüf ki, bu gün mənəvi təbliğatın əvəzinə səviyyəsiz şou verilişlər, maqazin proqramları təbliğ olunur.

- Necə düşünürsünüz,filmin uğurlu alınması kimdən asılıdır?

- Filmin uğurlu alınması kollektiv sənət olduğuna görə, bütün kollektivdən asilidır.Hərə öz işinin bilən və professional olmalıdır. Təbii ki, madiyyat ilk öndə duran amildir. Çünki əlində yetərincə məbləğ olduqda rejissorun, rəssamın, bəstəkarın da, hətta deyərdim ki aktyorun da fantaziyası yüksək səviyyədə olacaq. Ona görə ki, adlarını çəkdiyim sənət nümayəndələri artıq maddi sıxıntı çəkmədən işlərini həm məsuliyyətlə, həm də böyük həvəslə görəcəklər. Məsələn, rejissor hər hansısa ssenari haqqında düşünür ki,bu filmi daha geniş,daha böyük miqyasda çəkə bilər.Amma maddi vəziyyət pis olanda rejissor öz istəklərini tam şəkildə həyata keçirə bilmir.Onda da uğursuz bir film alınır.

- Övladlarınızdan hansınısa aktyor kimi görmək istərdiniz? Əksər sənət adamları övladlarının onların yolunu getməsini istəmirlər. Səbəbini isə bu sənətin çətinliklərinə dərindən bələd olmaqda görürlər. Axı hər bir sənətin öz çətinliyi var.

- Təbii ki, bu gün mən də bəzi sənət dostlarım kimi düşünürəm.Amma gələcəyi bilmək olmaz. Əgər övladlarımız aktyor olduqları zaman bu sənət dəyərləndiriləcəksə və onların həyat şəraiti gözəl olacaqsa, niyə də olmasın.Təbii ki, sənət seçimi onların özlərindən asılı olacaq.

- Sumqayıt şəhərində doğulmusunuz. Artıq neçə illərdir ki, bu şəhərdə yaşayırsınız. Bu şəhərin yetirməsisiniz.

- Sumqayıt şəhəri hər bir sumqayıtlı kimi, əlbəttə ki, mənə də dogma və əzizdir. Sumqayıt sakit və əsl yaşamalı şəhərdir. Amma hələ çox işlər görülməldir.

Zeynəb Abdullah

Xeberle.com