Karikatur "Avropa oyunları”na gələn asiyalı qonaqlar yapist rejimlə əməllicə məzələnib getdilər. Örnək üçün, Rəcəb Ərdoğanın "Adı Avropa oyunlarıdır, amma Avropa Birliyi dövlətlərindən heç bir başçı açılışa gəlməyib” sözlərini bir batman balla yemək olmazdı, amma yapistlər yedilər. Elə Putinin zarafatı da törənə toplaşanların bir-birinə "səmimi” münasibətindən xəbər verirdi: "Avropa Birliyini burda Türkiyə təmsil edir”. Hərə çalışırdı ki, o birisinin açıq böyrünə nəsə soxsun.
Yarışların ikinci günü başa çatanda medal sayına görə birinci yerdə İsveçrə, ikinci yerdə isə Azərbaycan gedirdi. Dünya idmanı üçün görünməmiş hadisə saymaq olardı. Təsəvvür edin, qitənin əsas idman dövlətlərindən sayılan Almaniya və Britaniya heç ilk onluğa düşməmişdi. Ya onlar dördüncü dərəcəli yoldan keçənləri yığıb yarışa göndəriblər, ya da bizim təşkilatçılar medalları görüm-baxımla özümüzünkülərə verirlər. İsveçrə də özümüzünküdür - qışda xizək sürmək yerimizdir.
Ancaq əlbəttə, ingilislərə bu da azdır. Gör necə paxıllığımızı çəkirlər, açılış mərasimini heç bir ingilis kanalı göstərməyibdir. Bu münasibətlə yapistlər Bakı küçələrində sorğu aparıblar, camaat deyib ki, yarışın işıqlandırılmasında ən çox yerli kanallardan razıdırlar, bir də Türkiyə və Rusiya kanallarından (Guya yerli kanallara baxan varmış). Amma sorğu nəticələrindən bu cümləyə ürəkdən güldüm: "Oyunlarla bağlı ən qərəzli və qeyri-obyektiv KİV Britaniyaya məxsusdur”. Yaxşı, əgər Britaniya KİV-ləri yarışları ümumiyyətlə işıqlandırmırsa, onlar necə qərəzli və qeyri-obyektiv ola bilər? Bu lap "Əkrəmin kitabını oxumamışam, ancaq alçaq romandır” söhbətinə bənzədi.
Yapist jurnalistlərin yarışdan xəbərin qığını da göstərməyən başqa dünya KİV-lərinə, misal üçün, "Evronyus” kanalına hücumu da mənasızdır, karikaturadır, biabırçılıqdır. Siz niyə anlamırsınız ki, bu avtoritar, feodal rejiminizlə sivil dünya üçün maraqlı deyilsiniz? Özünüz maraqlı deyilsinizsə, yarışınız niyə maraqlı olsun? Dünya neft-qaza görə bir az maraqlanırdı, indi o maraq da ölüb. Əgər halva-halva deməklə ağzınız şirin olursa, buyurun, təkrarlayın. Bəlkə birdən doğrudan şirinləşdiniz? Həyatda o qədər möcüzələr olur ki.
Açılış mərasiminə 100 milyon dolların xəclənməsi fantastik korrupsiyadan xəbər verir, bu haqda iqtisadçı ekspertlər artıq fikir bildiriblər. Doğrudan da, necə ola bilər ki, bundan yüz qat böyük miqyaslı, planetar yarış olan yay olimpiadasının açılış və bağlanış mərasiminə ingilislər 2012-ci ildə, Londonda, bir yerdə cəmi 60 milyon dollar xərcləmişdi, bizdə tək açılış 100 milyon tutur? Deməli pulları basıb yeyiblər.
Ordakı xüsusi effektlər-filan, tamaşalar da mənasız bir şey idi. İzah edim. Misal üçün, Zevsin öküz cildinə girib Avropanı oğurlaması səhnəsinin nümayişi nə demək idi? Bəlkə Azərbaycanda oğruların hakimiyyətdə olmasına işarə idi?
Yaxud, Nizami Gəncəvinin əsəri əsasında səhnə qayırırsan, amma ölkədə Nizaminin gerçək təbliği sıfırdan aşağıdır. İndiyə qədər Nizaminin "Xəmsə”si dilimizə normal çevrilməyib. Sovet dövründə Süleyman Rüstəm və Səməd Vurğun Nizamini elə tərcümə ediblər ki, indi oxuyanda zənn edirsən bunu hansısa Namiq Qaraçuxurlu yazıbdır.
Eyni söhbət Qobustanın təsvirlərindən istifadəyə, muğamatdan yersiz yararlanmaya da aiddir. Qobustan qayaüstü təsvirlərinin hazırkı durumu necədir? Qoruqda nələr baş verir? Təəssüf ki, çatan xəbərlər yaxşı heç nə demir. Muğama gələndə, on ildir muğam müsabiqəsi keçirirlər, amma hələ də səhnəyə sovet dövründən qalma Alim Qasımov çıxır. Başqa birini yetişdirə bilməmisinizsə, muğam adıyla basıb yediyiniz pullar hanı?
Yaxşı yadıma düşdü, xalqımızın Nizamiyə gerçək münasibəti haqda bir olmuş əhvalatın yeridir. Hardasa 10-15 il qabaq rəhmətlik şair, eyni zamanda gözəl və zarafatcıl adam Akif Səməd Sumqayıt yolundakı kafelərdən birində yeyib-içirmiş. Axırda hesab gəlir, şair baxır ki, pulu hesabın heç onda biri eləmir. Ofisianta deyir: "Sən bilirsən mən kiməm? Mən Nizami Gəncəviyəm. Get müdiri çağır”. Bir azdan müdir tərə batmış gəlir, deyir: "Siz Allah bağışlayın, Nizami müəllim. Bu gədə eşşəyin biridir, sizi tanımayıb, buyurun, qonağımız olun”.
Zamin Hacı
(musavat.com)
Xəbərdən istifadə edərkən istinad etmək vacibdir.
