İyulun 20-də Sumqayıt şəhərində Nəsimi adına Mədəniyyət və İstirahət Parkının "Yaşıl teatr”ında " Koreya kinosu festivalı”nın açılış mərasimi keçirilib.

Xeberle.com məlumat verir ki, festivalın açılış mərasimində çıxış edən Sumqayıt Şəhər İcra Hakimiyyəti başçısının sosial iqtisadi məsələlər üzrə müavini Lalə Hacıyeva, Koreya Respublikasının Azərbaycan Respublikasındakı səfiri Çoi Suk-İn və SEBA Assosiasiyasının şöbə müdiri İradə Nəcəfova Azərbaycan-Koreya mədəniyyətlərarası əlaqələrdən, bu cür tədbirlərin hər iki ölkə xalqlarının dostluq əlaqələrinin daha da möhkəmlənməsində mühüm əhəmiyyət kəsb etməsindən, həmçinin nümayiş etdiriləcək filmlər vasitəsilə Azərbaycan tamaşaçısının Koreya xalqının həyat tərzini, adət-ənənəsini, ictimai-siyasi həyatını daha yaxından tanımalarına şərait yaratmasından danışıblar. Qeyd olunub ki, festivalın açılışı əhəmiyyətli hadisədir və bu baxımdan "Koreya Kinosu Festivalı” əlaqələrin artan templə inkişaf etməsinə öz tövhəsini verəcək.

Sonra SEBA Assosiasiyasının sədr müavini İrina Zeynalova festivalı açıq elan edib.

Daha sonra tamaşaçılara 2011-ci ildə rejissor Gvon Chil tərəfindən lentə alınmış "Canlı efirdə məhəbbət” (Love On-Air) bədii filmi təqdim olunub.

Qeyd edək ki, Azərbaycan Mədəniyyət Fondu, SEBA (Seul-Bakı) Assosiasiyası, Koreya Fondunun təşkilatçılığı və Koreya Respublikasının Azərbaycan Respublikasındakı səfirliyinin dəstəyi ilə iyulun 6-dan avqustun 15-dək ölkənin 5 regionunda "Azərbaycanda Koreya kinosu festivalı”nın keçirilməsi planlaşdırılır.

Sumqayıt şəhərində keçirilən "Koreya kinosu festivalı” iyulun 29-a kimi davam edəcək.

Sumqayıtdan sonra isə festival 31 iyul-6 avqustda Ağdaşda, 7-15 avqust tarixlərində isə Qəbələdə keçiriləcək. Festivalda 10 Koreya filmi nümayiş olunur. Bütün filmlər SEBA Assosiasiyasının dəstəyi ilə Azərbaycan dilinə dublyaj olunub.

Xeberle.com

Fotolar Kamran Kazımzadənindir