Facebook sosial şəbəkəsində təsdiqlənmiş "Rəsmi Profil” statusunu alan Qafqazda ilk və yeganə şəxs, tanınmış kinoaktyorumuz Ruslan Sabirli Gürcüstan mətbuatında maraq doğurub. Belə ki, dünyanın bir nömrəli kübar jurnalı olan "OK!" jurnalının Gürcüstan nəşrində Ruslan Sabirlinin müsahibəsi dərc olunub. Bu barədə aktyor sosial şəbəkələrdəki səhifələrində məlumat paylaşıb.

"Sənə inanıram” və "Muradına çatan Günəş” seriallarından tamaşaçıların sevgisini Həmid və Murad obrazları ilə qazanan Ruslan Sabirli Xeberle.com-a bu barədə açıqlama verərək bildirib:

"Son zamanlar Gürcüstanda olmağım barədə məlumat sürətlə yayılır və burada da pərəstişkarlarımın sayı artmaqdadır. Gürcüstan mətbuatı da təbii ki, bu məlumata biganə qalmadı və "OK! Gürcüstan” jurnalına ilk müsahibəmi verdim. Ümidvaram ki, bu son müsahibəm deyildir və burada olduğum müddət ərzində doğma Azərbaycanımda olduğu kimi Gürcüstan media və mətbuatının mütəmadi gündəmində olacağam, həmçinin Gürcüstan kinomatoqrafiyası ilə əməkdaşlığıma da inanıram.”

Xatırladaq ki, Ruslan Sabirli sumqayıtlıdır və bu şəhərdə böyüyüb boya başa çatıb.
Xeberle.com