"BİZİM KÜÇƏ”nin lap sonuncu döngəsində kiçik bir "PARK” var. Hər bazar ora gedirəm. Bu səhər də getmişdim. Skamyaların birində oturmuşdum. Yaxınlıqdakı evdən "TÜTƏK SƏSİ” gəlirdi. (Televizorun səsini xeyli artırmışdılar). Qulaq asa-asa xəyallara dalmışdım. Onu düşünürdüm - "TƏHMİNƏ”ni. Jurnalist dostumu...
Mənə yaxın adam idi. "ƏSL DOST”un kimdi deyə soruşsalar, məhz onun adını çəkərəm. Mərhəmətli idi, yaxın bildiyi adamın uğrunda ölümə də gedərdi. Sənətini də sevirdi. Bir sözlə - "ONUN BÖYÜK ÜRƏYİ” vardı. Danışıb-gülməyi xoşlayırdı. Amma üzdə şən görünməyə çalışsa da, daxilən narahat və kədərli idi.
Həyatı əvvəldən gətirməmişdi. Uğursuzluq elə "ÖMRÜN İLK SAATI”ndan başlamışdı, o doğulan vaxt anası vəfat etmişdi. Sonralar hətta adam ölümündə də təqsirləndirilmişdi. "QƏTLDƏN YEDDİ GÜN SONRA” həbs edilmişdi. Uzun müddət "İSTİNTAQ” getdi, çox incitdilər onu. Aylarla "BAĞLI QAPI” arxasında qaldı. Sanki öz ömrünü yox, "ÖZGƏ ÖMÜR” yaşayırdı. Sonralar bu cinayətdə onun əlinin olmaması üzə çıxdı.
Bir neçə gün əvvəl meyidini Türkiyədə "OTEL OTAĞI”nda tapmışdılar. Yerdə isə öz xətti ilə yazdığı əl boyda kağız parçası:"ÖLSƏM, BAĞIŞLA”. Bu, intihar idi. Çox mütəəssir olmuşdum.. Doğulduğu "BİR CƏNUB ŞƏHƏRİNDƏ” dəfn etdilər. Bakıya həmişə belə deyirdi. Hər dəfə onun qəbrini ziyarətə gedəndə başdaşından mənə baxan qara gözlərinə baxıb soruşuram ki, "SƏN NİYƏ SUSURSAN”, danış, intiharının səbəblərini de.. Çünki hələ səbəbi tapa bilməyiblər...
Türkiyə səfərinin səbəbini soruşanda gülə - gülə demişdi ki, necə deyərlər, "HƏM ZİYARƏT, HƏM TİCARƏT”. Sonra da əlavə etmişdi ki, karyerasının "ƏN VACİB MÜSAHİBƏ” sini məhz orada alacaq. Amma deməmişdi kimdən...
"Sonuncu dəfə o nə vaxt ""AD GÜNÜ” keçirib” sualını versəniz, cavab tapa bilməyəcəm. Çünki belə bir şeyi xatırlamıram. Təbrikləri də qəbul etmirdi.
Onu və onunla bağlı hadisələri niyə məhz bu gün xatırladığımı bir neçə saat sonra bildim. Yadıma düşdü ki, bu gün gözəl filmlərimizin rejissoru və operatoru, xalq artisti Rasim Ocaqovun doğum günüdür. O Rasim Ocaqovun ki, kinomuza yeni nəfəs gətirdi, sevilən filmlərimizə quruluş verdi, kinomuza onun gözü ilə baxdıq.
Nə qədər Azərbaycan kinosu və tamaşaçısı var, onun rejissor və operator kimi çəkdiyi filmlər baxılacaq və baxıldıqca daha da seviləcək. Neçə il keçirsə keçsin.
Doğum günün mübarək, Böyük Sənətkar! Şəxsiyyətinə, sənətinə, ruhuna alqış!
"QATIR MƏMMƏD” (Anar Həsənli)
