Xeberle.com-un məlumatına görə, bu gün Sumqayıt Dövlət Rəsm Qalereyasında Sumqayıt rəssamlarının əsərlərindən ibarət "Rənglərin aləmi" adlı sərgiyə start verilib. Sərgidə rəssamlar Vaqif Nəzirov, Fazil Abasquluzadə, Murad Kərimov, Nizami Dadaşov, Osman Salmanov, Namiq Cavad, İntiqam Cəfərov, Emin Nəbiyev, Nəsibə Şükürova, Nigar Qurbanova, Məşədi Qafarzadə Vidadi, Əli Qafarlı, Mikayıl Abdullayev, Yusif Kətanov, Ellada Həsənova, Gülşən Ağayeva, Pərviz Mahmudov, Orxan Əhmədov, Şahin Quliyev, Tofiq Əhmədov və Dilşad Hüseynovanın müxtəlif texnikalarda işlənmiş ümumilikdə 103 sənət nümunəsi nümayiş olunur. Sumqayıtın sənət ustalarının nümayiş etdikləri sənət nümunələri arasında 3 ədəd qrafika, 91 ədəd rəngkarlıq, 19 ədəd keramika, 9 ədəd xalça və 3 ədəd dekorativ tətbiqi sənət əsəri sərgiyə xüsusi gözəllik verir.

Sumqayıt şəhər Mədəniyyət və Turizm İdarəsi və Sumqayıt Dövlət Rəsm Qalereyasının birgə təşkilatçılığı ilə keçirilən və bir həftə davam edəcək sərginin açılış mərasimində Sumqayıt şəhər icra hakimiyyətinin başçısı Zakir Fərəcov iştirak edib. İcra başçısı sərgidə nümayiş olunan rəsm əsərlərinə tamaşa edib.

Tədbiri giriş sözü ilə açan Sumqayıt şəhər Mədəniyyət və Turizm İdarəsinin rəisi Mehman Şükürov rəhbərlik etdiyi sahəyə xüsusi diqqət ayırdığı üçün İcra başçısının səmərəli fəaliyyətini təqdir edib və kollektiv adından ona öz minnətdarlığını bildirib.

Rəssam Nəsibə Şükürova isə çıxışında mövcud olan bir sıra problemlərdən söz açıb və bu problemlərin Zakir Fərəcovun dəstəyi ilə həll ediləcəyinə ümidvar olduğunu bildirib.

Sumqayıt şəhər icra hakimiyyətinin başçısı Zakir Fərəcov çıxış edərək rəssamları belə bir sərginin keçirilməsi münasibətilə təbrik edib. İcra başçısı şəhərdə həyata keçirilən yeniliklərdən bəhs edib və mədəniyyət sahəsində olan problemlərin həll ediləcəyini qeyd edib. Z. Fərəcov rəssamlara gələcək fəaliyyətində uğurlar arzulayıb.

Tədbirdə 3 saylı S.Rüstəmov adına Uşaq İncəsənət Məktəbinin şagird və müəllim kollektivinin musiqi nömrəsi ilə çıxış edib.
Xeberle.com