Yeni il ərəfəsində şəhərin mədəni mühitinin hazırkı durumu və gələcək planlarla bağlı Sumqayıt şəhər Mədəniyyət və Turizm İdarəsinin rəisi Mehman Şükürovla söhbətləşdik.
Qeyd edək ki, M. Şükürovun bütün fəaliyyəti Sumqayıtın mədəni həyatı ilə sıx bağlıdır. On yeddi il Sumqayıt Dövlət Musiqili Dram Teatrına rəhbərlik edib. Onun Sumqayıt şəhər MTİ-nə rəhbər vəzifəyə gətirilməsindən bir aydan bir az artıq vaxt keçməsinə baxmayaraq şəhərin mədəni həyatında diqqətçəkən canlanma müşahidə olunmaqdadır. 
Bunları nəzərə alaraq, əməkdaşımızın Mehman Şükürovdan aldığı müsahibəni oxucularımıza təqdim edirik: 
QISA TANITMA: Mehman Şakir oğlu Şükürov 25 fevral 1965-ci ildə Ağsu rayonunun birinci Qaraqaşlı kəndində anadan olub.
1987-1991-ci illərdə Azərbaycan Dövlət İncəsənət Universitetinin "mədəni-maarif” fakültəsində təhsilini başa vuraraq 1990-1993-cü illərdə S.Vurğun adına Mədəniyyət sarayında xalq teatrının rejissoru, 1993- 1997-ci illərdə sözügedən sarayın direktoru, 1997-2014-cü illərdə Sumqayıt Dövlət Musiqili Dram Teatrının direktoru vəzifəsində çalışıb.
Sumqayıt Dövlət Musiqili Dram Teatrında işlədiyi müddət ərzində teatrın kollektivi onun rəhbərliyi ilə Hindistan, Türkiyə, Ukrayna, Türkmənistan, Rusiya və Gürcüstanda beynəlxalq teatr festivallarında uğurla çıxış edərək müxtəlif diplomlara layiq görülüb.
Azərbaycan Respublikası Prezidentinin 2008-ci il 25 sentyabr tarixli Sərəncamı ilə Azərbaycan Respublikasının Əməkdar Mədəniyyət İşçisi fəxri adına layiq görülülüb.
2015-ci il iyun ayının 11-dən Azərbaycan Dövlət Gənc Tamaşaçılar Teatrının direktor müavini vəzifəsində çalışıb.
2015-ci il 18 noyabr tarixdən Sumqayıt şəhər Mədəniyyət və Turizm İdarəsinin rəisi vəzifəsinə təyin edilib.
Ailəlidir. 2 övladı var.
-Mehman müəllim, artıq 2015-ci ilin təqvim ili başa çatır. Sizi həm yeni il, həm də Dünya Azərbaycanlılarının Həmrəyliyi Günü münasibətilə təbrik edirik.
-Təşəkkür edirəm. Mən də sizi, şəhərimizin sakinlərini, dünya azərbaycanlılarını bayram münasibətilə təbrik edirəm. Qarşıladığımız yeni il xalqımıza uğur, müvəffəqiyyət, fiaravanlıq gətirsin. Harada yaşamasından asılı olmayaraq, hər bir azərbaycanlının evində yalnız xoş musiqi sədaları eşidilsin. 
-Siz Sumqayıt şəhər Mədəniyyət və Turizm İdarəsinə rəis təyin olunduqdan sonra, şəhərin mədəni həyatında nəzərəçarpan canlanma hiss edilir. Bunu həm də Sizin şəhərin mədəni mühitinə yaxından bələd olmağınızla əlaqələndirmək olarmı? 
-Tamamilə doğrudur. Həm bu, şəhərin sakini olaraq sumqayıtlıları yaxşı tanımağım, həm də uzun illər şəhərin mədəniyyət sahəsindəki fəaliyyətim mənə bugünkü iş təcrübəsində çox böyük kömək olur. Yəni, haradan və nədən başlamaq lazım olduğunu bilmək üçün çox da uzun vaxt lazım olmadı. Bir sözlə, Sumqayıtın mədıni həyatına bələd olmağım, işimə təkan verdi.
-2015-ci ili Sumqayıtın mədəni həyatını ümumilikdə necə xarakterizə edərdiniz?
-2015-ci ildə şəhərimizdə mədəniyyət sahəsində böyük islahatlar, yadda qalan hadisələr olmasa da, mədəniyyət müəssisələrinin kollektivləri hər zaman olduğu kimi, əlamətdar və tarixi günlərlə bağlı tədbirlər təşkil ediblər. Bu tədbirlər mədəniyyət müəssisələrinin daxilində, təhsil və səhiyyə ocaqlarında eləcə də Sumqayıtda olan hərbi hissə və qospitallarda keçirilib. Kollektivlər hər biri öz profilinə uyğun şəkildə fəaliyyət göstərib. Rəsm sərgiləri, kitab sərgiləri, konsertlər və s. mədəni-kütləvi tədbirlər davamlı olaraq təşkil edilib.
-Nazir Əbülfəs Qarayev son kollegiya iclasında korrupsiya hallarına qarşı ciddi çağırışlar səsləndirdi. Siz bu istiqamətdə hansı addımları atırsınız?
-Sumqayıt şəhər Mədəniyyət və Turizm idarəsi olaraq biz ölkə başçısı cənab İlham Əliyevin sərəncam və fərmanlarını, Mədəniyyət və Turizm naziri Əbülfəs Qarayevin əmr və göstərişlərini layiqincə yerinə yetirməyi, qanun çərçivəsində fəaliyyət göstərməyi, hansisa qanun pozuntularına yol vermədən fəaliyyətimizi qurmağı qarşımıza məqsəd qoymuşuq. Dövlətimizə, xalqımıza mədəniyyət işçiləri olaraq yalnız qanun çərçivəsində xidmət göstəririk. Çalışırıq ki, belə neqativ hallar ümumiyyətlə baş verməsin. 
-Qarşıya qoyduğunuz plan və məqsədlər barədə məlumat verməyinizi xahiş edirik.
-İcra Hakimiyyətinin başçısı Zakir Fərəcovun şəhərimizdə son aylarda başladığı islahatlar və həyata keçirdiyi tikinti quruculuq işləri mədəniyyət sahəsinə də öz təsirini göstərməkdədir. Belə ki, şəhərdə bir yeni musiqi məktəbinin və Heydər Əliyev Mərkəzinin daha yüksək səviyyəli və şəraitli bina ilə təmin olunması məqsədilə artıq tikinti işlərinə başlanılıb. O cümlədən, gələcəkdə şəhərimizdə rəssamların yaradıcılıq evinin tikintisi nəzərdə tutulub. 
Artıq şəhər sakinlərinin istirahətinin daha yüksək səviyyədə təmin olunması məqsədilə dənizkənarı parkda yeni bulvar salınması işlərinə başlanıb. Təbii ki, biz də bu işlərdən kənarda qalmayacaq, üzərimizə düşən vəzifələrin öhdəsindən layiqincə gəlməyə çalışacağıq. Mədəniyyət və Turizm idarəsi olaraq bir sıra yeni kollektivlər yaratmağı, ölkə daxilində və ölkə hüdudlarından kənarda keçiriləcək müsabiqə və festivallara qatılmağı düşünürük ki, bu barədə işlərimiz reallaşdıqdan sonra ətraflı məlumat verə bilərik.
-Təşəkkür edirik!
Sumqayitfakt.az