Bu gün Sumqayıt Dövlət Rəsm Qalereyasında Sumqayıt şəhər Mədəniyyət və Turizm İdarəsinin və Sumqayıt Dövlət Rəsm Qalereyasının birgə təşkilatçılığı ilə 20 Yanvar faciəsinin 26-cı ildönümünə həsr olunmuş"Tariximizin izləri” adlı sərgi keçirilib. Sumqayıt şəhər Mədəniyyət və Turizm idarəsinin mətbuat xidmətindən Xeberle.com-a verilən məlumata görə, sərgidə qalereyanın xüsusi fondundan peşəkar rəssamların 22 ədəd rəngkarlıq və 2 ədəd heykəltaraşlıq əsərləri nümayiş olunub.

Tədbirdə Ə.Kərim adına "Poeziya” klubunun direktoru İbrahim İlyaslı və şairə Almaz Əliyeva çıxış edərək 20 Yanvar faciəsinin müstəqilliyimizin qazanılmasında müstəsna rolu və bu hadisənin Azərbaycan tarixinin qəhrəmanlıq səhifəsi kimi əhəmiyyəti haqqında danışıblar.

Tədbirdə həmçinin Şəhər Mədəniyyət Evinin qiraət dərnəyi üzvlərinin ifasında S.Rüstəmin "Ana və poçtalyon” şerinə kompazisiya canlandırılıb, özfəaliyyət kollektivi üzvlərinin ifasında vətənpərvərlik ruhunda mahnılar ifa edilib, videoçarx nümayiş olunub.

Tədbir boyu nümayiş olunan kompazisiyalar sumqayıtlı gənc rəssam Pərviz Mahmudov tərəfindən kətan üzərinə köçürülərək Dövlət Rəsm Qalereyasına hədiyyə edilib.

Xatırladaq ki, sərgi iki həftə davam edəcək.

Xeberle.com