"Xeberle.com” portalında "Sumqayıtda mədəniyyətə diqqət və onun axsayan tərəfi – PROBLEM” və "Sumqayıt teatrını ağır durumdan necə çıxarmalı- Ziyalı mövqeyi" başlıqları altında yayımlanan yazılarda Sumqayıt Dövlət Dram Teatrı ilə bağlı səslənən fikirlərə mədəniyyət müəssisəsinin Mətbuat katibi Leyla Eynullayeva münasibət bildirib. L. Eynullayeva qeyd edib ki, Sumqayıtda mədəniyyət müəssiələrinin fəaliyyəti ilə bağlı polemikanın yaranması təqdirəlayiq haldır, amma məsələyə ədalətli yanaşmaq lazımdır: "Amma o yerdə ki, açıq-açığına qərəzli mövqe olur, orda hansı polemikadan və xoş niyyətdən danışmaq olar? "Sumqayıtda mədəniyyətə diqqət və onun axsayan tərəfi – PROBLEM” başlıqlı yazıda teatrı hədəf seçilib. Müəllifi də məlum deyil. Ziyalı mövqeyi başlıqlı yazı isə tanınmış jurnalist, yazıçı-publisist Eyruz Məmmədovun qələmindən çıxıb. İllər öncə mədəniyyət sahəsində əldə olunan uğurlara tarixi ekskurs edən müəllif bu günün mədəniyyət mənzərəsinə də nəzər salır və arzularını dilə gətirir. Taleyini Sumqayıtla bağlamış istedadlı bir qələm adamını təqdir edirik. Amma yazıdakı qeyri-obyektivlik təəssüf doğurur. Hörmətli Eyruz müəllim teatrda çat əmələ gəldiyini yazır. Amma, zənnimizcə, bu çatı teatra getməyib, tamaşaları uzaqdan-uzağa tənqid atəşinə tutan müəlliflər yaratmaq istəyirlər. Eyruz müəllim təbliğat, reklam işinin zəifliyindən danışır. Son 5 ayda portalları, qəzetləri və televiziya kanallarını izləsəydi, yəqin ki, bu fikrindən daşınardı. SDDT-nın mətbuat katibi vurğulayıb ki, teatrda peşəkar kollektiv çalışır. Yetər ki onları həvəsdən salmasınlar: "Bu gün teatrımızda əsaslı təmir gedir. Şəhər icra hakimiyyətinin başçısı Zakir Fərəcova minnətdarıq. Şübhəsiz ki, təmirdən sonra beynəlxalq standartlara cavab verən binada hər kəs daha çox məsuliyyət hiss edəcək. Sadəcə, bir məsələ məni düşündürür. Nədən məhz teatra bu qədər aqressiv münasibət var?” L. Eynullayeva açıqlamasında teatrın repertuarında olan və istehsalat prosesi gerçəkləşdirilən tamaşalara da diqqət çəkib. O, vurğulayıb ki, teatrın səhnəsində Yucin Onilin "Qarağaclar altında məhəbbət”, Çingiz Aytmatovun "Ümid sahili”, Con Qolsuorsinin "Birincilər və sonuncular”, İsi Məlikzadənin "Subaylarınızdan görəsiniz”, Elçin Əfəndiyevin "Qatil” M.F.Axundzadənin "Müsyö Jordan və dərviş Məstəli şah”, "Hacı Qara” Aqşin Babayevin "Xilaskar”, İlyas Əfəndiyev "Sən həmişə mənimləsən”, Hidayət Orucov "Burdan min atlı keçdi”, Con Patrikin "Qocanı öldürməliyik”, Əziz Nesin "Öldür məni canciyər”, Əli Əmirli "İyirmi ildən sonra” tamaşaları oynanılıb. Mətbuat katibi istehsalat prosesi gerçəkləşdirilən tamaşalardan İsi Məlikzadənin "Körpü”, Atol Fuqardın "Qan qardaşları”, Alber Kamyunun "Kaliqula”əsərlərini nümunə göstərib.