Mütəmadi olaraq Sumqayıtda gənc istedadları axtarıb tapır, onlar haqqında oxucularımıza məlumat verməyə çalışırıq. Bu, eyni zamanda həmin gənclərin tanınması, təbliği məqsədi də daşıyır. Budəfəki istedadımız gənc aşıq Səbinə Gədəbəylidir (Hüseynova).

-Mümkünsə, özünüz haqda qısa məlumat verərdiniz.

-Gədəbəydə doğulmuşam, 18 yaşım var, 2 yaşımdan Sumqayıtda yaşayıram. 11 yaşımdan aşıq sənəti ilə maraqlanmağa başladım. 2 ildir musiqi kollecini bitirmişəm. Fəaliyyətimə "Şəhər” Mədəniyyət evində başlamışam.

-İlk dəfə saz tutmağı sizə kim öyrədib? Necə oldu saza maraq yarandı?

-İlk müəllimim Qönçə müəllimə olub. Lazım olanda indi də köməkliyini əsirgəmir. Son 2 ildə bu sənətin incəliklərini Mübariz Kəlbəcərlidən öyrənirəm. Gözümü açandan evimizdə saz görmüşəm, babam həmişə saz çalıb. Nənəm Gədəbəy rayonunda klub müdiridir. Anam hədsiz saz aşiqidir elə həmişə arzusu olub ki, övladı böyüyəndə tanınmış aşıq olsun. İnşallah ki, anamın arzusunu, elə həm də öz arzumu həyata keçirməyə çalışacam.

-Son olaraq hansı yarışlarda iştirak etmisiniz?

-Azərbaycan Aşıqlar Birliyinin də üzvüyəm. "Çeşmə qızlar” ansamblının üzvü olmuşam. 11 yaşımdan müxtəlif tədbirlərdə, yarışlarda olmuşam. Dəfələrlə şəhər tədbirlərində iştirak etmişəm. Fürsətdən istifadə edib şəhər Mədəniyyət və Turizm İdarəsinin və "Şəhər” Mədəniyyət evinin rəhbərliyinə təşəkkürümü bildirirəm. Hazırda DTV telekanalında efirə çıxan "Köklə sazı” yarışmasının qalan yeganə xanım iştirakçısıyam. Yeri gəlmişkən, aprelin sonlarında Fransada məclisimiz planlaşdırılıb. Tədbir Azərbaycanın Fransadakı səfirliyi tərəfindən təşkil olunacaq. Sumqayıtdan tək mən gedəcəm. Çalışacam ki, Azərbaycan aşıq sənətini layiqincə təmsil edim.

-Bildiyimizə görə həm saz çalır, həm də oxuyursunuz. Sizə bunları birlikdə etmək nə qədər asandır?

-Doğru vurğuladınız. Bu elə bir sənətdir ki, saz olan yerdə söz də sinədən gəlir. Yəni aşıq çalan zaman oxumaq istəyi də qeyri-iradi yaranır. Əvvəlcədən az-az özüm üçün oxuyurdum, amma son vaxtlar ustadlarım məsləhət gördü ki, el məclislərində oxuya da bilərəm.

-Məclislərdə çoxlu məzəli, qeyri-adi əhvalatlar olur. Sizin başınıza maraqlı hadisələr gəlibmi?

-Haqqında bəhs etdiyim Mübariz Kəlbəcərli sazı fırlada bilir, bu yeniliyi onun adı ilə bağlayırlar. Mən də onun tələbəsiyəm. Məclislər də - bilirsiniz ki, müxtəlif olur, müxtəlif də insanlar iştirak edir. İçəni də olur, içməyəni də, özünü apara biləni də, bilməyəni də. Gərək heç kəsi incitməyən, kimsənin xətrinə dəyməyəsən. Bir dəfə məclisdə bir kişi yaxınlaşıb yaxşı da pul qoydu sazın arasına və mənə dedi ki, sazı qəşəng çalırsan, amma sən o Mübariz Kəlbəcərli var, sazı onun kimi boynunun arxasında çal mənə də ləzzət eləsin. Mən isə ona yumşaq şəkildə cavab verdim ki, mən Mübariz müəllim deyiləm. Bir də ki kişi ayrı, xanım ayrı. Elə şeylər var ki, kişi edir xanım etməməlidir, elə şeylər də var ki, əksinə. Həmin o verdiyi pulu götürüb kostyumun iç cibinə qoydu. Sizə etiraf edim ki, sazı elə çalıram, amma evdə, özümə də maraqlıdır ki, ustadım bunu necə belə uğurla ifa edə bilir.

-Toylara gedirsiniz? Saz musiqisinə tələbat nə qədərdir?

-Bəli, gedirəm. Əvvəl bəlkə də saza o qədər tələbat yox idi. Amma indi xeyli artıb. Məsələn, Azərbaycanın şimal bölgəsi hara, saz sənəti hara?! Amma qəribədir ki, ən çox Quba, Xaçmaz, Siyəzən və Şabran rayonlarına dəvət alıram. Orada böyük maraq var saza. Bu da məni çox sevindirir. Hər birimiz bu sənətin kiçik daşıyıcısıyıq və gərək bu missiyanı da uğurla davam etdirək. Yeri gəlmişkən, mən məclislərə gedəndə hər zaman əyin-başıma, görünüşümə çox ciddi yanaşıram. Yəni mənə görə iştirakçılar qarşısında xırda belə bir nöqsan olmamalıdır. Çünki çalışıram ki, görünüşümlə ifamı tamamlayım. Hər bir xırda nüansla sənətimə dəyər verməyə çalışıram.

-Hansısa həmkarlarınızla yığışıb aşıq sənəti ilə bağlı fikir mübadiləsi aparırsınızmı?

-Əlbəttə, mütəmadi olaraq görüşürük. Saz ifa edirik, arada deyişirik. Həm Sumqayıtda, həm Bakıda. Elə olur ki, dərdləşirik. Sumqayıtda Kəmalə Qubadlı, Qönçə Kazımlı, aşıq Habillə görüşürük. Bu görüşlər mənim kimi gənclərə böyük stimul və həvəs verir.

-Bir gənc kimi Sumqayıtda aşıq sənətinin inkişafı üçün daha nəyin olmasını istərdiniz?

-Əl-ələ verib səylərimizi, gücümüzü birləşdirərək yaxşı bir qrup yarada bilərik. Sumqayıtda aşıq qrupu yoxdur, amma buna böyük bir tələbat var. Qrupun yaradılması ilə biz bir-bizirmizdən bəhrələnə bilərik, xeyri olar yalnız.

-Siz çox sakitsiniz. Amma aşıqları gur, temperamentli və bir az da səs-küylü görməyə öyrəşmişik.

-Mən səhnəyə çıxanda tamam başqa cür oluram. Ciddi olmağımla bərabər, səhnəni ələ ala bilirəm. Yeri gəlmişkən, müəllimimin bir sözü var, deyirdi ki, sən səhnəyə çıxan zaman hamı sənə diqqət etməli, kimsə danışmamalı, ayrı şey haqqında düşünməyərək sənin çıxışının nədən başlayıb nədə bitməsini maraqla gözləməlidir.

-Hər yeni başlayan ifaçının təbliğata, tanıtıma ehtiyacı var. Özünü necə təqdim edirsən adətən? Reklamın, PR-ın aparılırmı?

-Aşıq olub diyar diyar gəzənin

Əzəl başdan pür kamalı gərəkdir

Oturub durmaqda ədəbin bilə…

Mərifət elmində dolu gərəkdir

Gərək nə edirsənsə, ədəb-ərkanla edəsən. Ailənin sənə verdiyi tərbiyəni bütün dolğunluğu və gözəlliyi ilə göstərəsən. Sənin davranışın, ağzından çıxan söz elə sənin tanıtımın, reklamındır. Belə olarsa, səni hər yerdə bəyənəcəklər. Sözün düzü, əvvəl utanırdım. Amma son vaxtlar dostlarımız ocial şəbəkələrdə bəzi tədbir və konsertlərimizdəki görüntülərdən kiçik hissələr kəsib qoyurlar. Mənə də deyirlər ki, bax tutaq ki, filan yerdə, hazırdır. Çox yaxşı şeydir, çünki istənilən vaxt bu görüntülərə baxmaq olur.

-Səhnəyə çıxanda nə hiss edirsən? Ən böyük arzun nədir?

- Bəzən sual verirlər, ifa edəndə, niyə gözünü yumursan, elə bil yatırsan. Gözünü aç bir videoya, fotoya bax. Amma mən özümdə olmuram, fikrimd kimsədə olmur. Ayrı bir dünyada oluram. Sanki kənddə dağın başında, çayın kənarındayam. Mən özümə heç vaxt aşıq deməmişəm, böyük ustadlarımın yanında mən hələ çox gəncəm. Hətta dahi ustadımız rəhmətlik Aşıq Ələsgər ahıl yaşında da heç vaxt deməyib ki, mən böyük aşıqam, dahi sənətkaram və sair.

O ki qaldı ən böyük arzuma, tanınmış ədəbli-ərkanlı xanım aşıq olmaq istəyirəm. Bundan öncə isə İncəsənət universitetinə qəbul olub Fəzail Miskinlinin şöbəsində oxumağı arzulayıram.
Söhbətləşdilər: 
Elnur Ağayev, 
Kamal Almuradlı
Xeberle.com